راجستھان پٹنہ کے پیر بہور تھانہ علاقے کے لال باغ محلے میں جمعہ کی صبح تقریباً 7 بجے ایک دل دہلا دینے والی واردات نے پورے علاقے میں خوف و ہراس پھیلا دیا۔ نواب عالم نامی شخص کو اس کے گھر میں ہی نامعلوم حملہ آور نے گلا کاٹ کر بے دردی سے قتل کر دیا۔ اس حملے میں ان کی اہلیہ شدید زخمی ہو گئی ہیں، جنہیں علاج کے لیے پٹنہ میڈیکل کالج اینڈ ہسپتال میں داخل کرایا گیا ہے، جہاں ان کی حالت نازک بتائی جا رہی ہے۔
واقعے کے بعد مقامی لوگوں میں شدید غم و غصہ پایا جا رہا ہے۔ لواحقین اور دیہاتی کئی گھنٹوں سے لاش کو سڑک پر رکھ کر احتجاج کر رہے ہیں اور ملزمان کی فوری گرفتاری کا مطالبہ کر رہے ہیں۔ احتجاج کرنے والوں کا کہنا ہے کہ واقعے کے اتنے گھنٹے گزرنے کے باوجود پولیس کی کارروائی سست ہے، جس سے عوام میں ناراضگی بڑھ رہی ہے۔
اس سنگین واردات پر گہرے دکھ کا اظہار کرتے ہوئے امیرِ شریعت بہار، اوڈیشہ و جھارکھنڈ، مولانا احمد ولی فیصل رحمانی نے کہا کہ ریاست میں قانون کی حکمرانی کو یقینی بنانا انتہائی ضروری ہے۔ انہوں نے کہا کہ دارالحکومت پٹنہ میں اس طرح کی بہیمانہ قتل کی وارداتیں قانون و انتظام پر سنگین سوالات کھڑے کرتی ہیں۔
دوسری جانب ناظمِ امارتِ شرعیہ مولانا مفتی محمد سعید الرحمٰن قاسمی نے بھی اس واقعے پر سخت ردعمل ظاہر کرتے ہوئے حکومت سے ملزمان کی فوری گرفتاری اور سخت سزا کا مطالبہ کیا ہے۔ انہوں نے متاثرہ خاندان کے لیے مناسب معاوضے کی بھی اپیل کی۔
امارتِ شرعیہ کی جانب سے ایک اعلیٰ سطحی وفد بھی موقع پر پہنچا، جس نے متاثرہ خاندان سے ملاقات کر کے تعزیت کا اظہار کیا اور حالات کا جائزہ لیا۔ وفد نے احتجاج کرنے والے لوگوں سے تحمل سے کام لینے کی اپیل کی اور یقین دہانی کرائی کہ ان کے مطالبات کو انتظامیہ تک بھرپور طریقے سے پہنچایا جائے گا۔
پٹنہ جیسے حساس اور دارالحکومت شہر میں پیش آنے والا یہ واقعہ انتظامیہ کے لیے ایک بڑا چیلنج بن گیا ہے۔ مقامی لوگوں کا کہنا ہے کہ اگر جلد کارروائی نہ کی گئی تو احتجاج مزید شدت اختیار کرے گا۔
فی الحال پولیس معاملے کی تحقیقات میں مصروف ہے اور ملزمان کی تلاش جاری ہے۔
PatnaNews #BiharNews #MurderCase #LawAndOrder #CrimeNews #BreakingNews #PMCH #InsaafTimes #Violence #JusticeForVictim #PublicProtest #PoliceInvestigation #AmirEShariat #ImaratEShariah
