ملک میں تعلیمی اور سیاسی دونوں محاذوں پر جاری تنازعات کے درمیان سوشیل ڈیموکریٹک پارٹی آف انڈیا نے نیٹ 2026 میں مبینہ پرچہ لیک اور مغربی بنگال میں انتخابی نتائج کے بعد مبینہ فرقہ وارانہ تشدد کے واقعات پر شدید تشویش کا اظہار کیا ہے۔ پارٹی نے دونوں معاملات میں غیر جانبدارانہ تحقیقات، ذمہ داروں کے خلاف سخت کارروائی اور نظام میں اصلاحات کا مطالبہ کیا ہے۔
پرچہ لیک سے امتحانی نظام پر سوالات
پارٹی کی قومی سکریٹری سعدیہ سعیدہ نے اپنے جاری کردہ بیان میں کہا ہے کہ بڑے پیمانے پر پرچہ لیک اور منظم نقل کے گروہوں کے انکشاف کے بعد نیٹ 2026 کو منسوخ کیا جانا ملک کے امتحانی نظام کی سنگین خامیوں کو ظاہر کرتا ہے۔ انہوں نے اسے قومی ٹیسٹنگ ایجنسی اور مرکزی حکومت کی “نظامی ناکامی” قرار دیا۔
بیان میں کہا گیا کہ ملک بھر کے بائیس لاکھ سے زائد طلبہ نے برسوں کی محنت، مالی مشکلات اور ذہنی دباؤ کے درمیان یہ امتحان دیا تھا، تاہم پرچہ لیک نے ان کے مستقبل کو غیر یقینی اور مایوسی کی کیفیت میں دھکیل دیا ہے۔
پارٹی نے الزام لگایا کہ بار بار ہونے والے پرچہ لیک اور امتحانات میں بے ضابطگیوں سے واضح ہوتا ہے کہ نظامِ امتحانات میں جڑ پکڑ چکا بدعنوانی اور غفلت ایک سنگین بحران کی شکل اختیار کر چکی ہے۔ پارٹی نے مطالبہ کیا کہ اس معاملے کی مقررہ وقت میں شفاف تحقیقات کی جائیں اور ذمہ داروں کی نشاندہی کر کے سخت کارروائی کی جائے۔
مغربی بنگال میں تشدد کے الزامات
دوسری جانب پارٹی کے قومی سکریٹری یٰسین محی الدین نے مغربی بنگال میں انتخابی نتائج کے بعد مبینہ فرقہ وارانہ تشدد اور حملوں پر تشویش کا اظہار کیا ہے۔ انہوں نے الزام لگایا کہ ریاست میں بعض عناصر سیاسی تقسیم اور تشدد کو فروغ دینے کی کوشش کر رہے ہیں۔
بیان میں کہا گیا کہ مختلف اضلاع سے موصول رپورٹس کے مطابق فتح جلوسوں کی آڑ میں مذہبی مقامات، اقلیتی برادری اور ان کی املاک کو نشانہ بنایا گیا۔ پارٹی نے ہگلی میں ایک پنچایت رکن کے قتل سمیت متعدد واقعات کا ذکر کرتے ہوئے اسے “انتخابی بعد تشدد کا سنگین رجحان” قرار دیا۔
پارٹی نے یہ بھی دعویٰ کیا کہ چار سے سات مئی کے دوران کئی اضلاع میں درجنوں پرتشدد واقعات پیش آئے، جن میں گھروں اور دکانوں پر حملے اور مذہبی مقامات کو نقصان پہنچانے کے واقعات شامل ہیں۔
غیر جانبدارانہ تحقیقات کا مطالبہ
پارٹی نے دونوں معاملات میں آزاد اور غیر جانبدار تحقیقات کا مطالبہ کرتے ہوئے کہا ہے کہ ذمہ داروں کے خلاف سخت کارروائی کی جانی چاہیے۔ پارٹی نے خبردار کیا کہ اگر بروقت ٹھوس اقدامات نہ کیے گئے تو اس سے نہ صرف طلبہ کا مستقبل متاثر ہوگا بلکہ معاشرتی ہم آہنگی پر بھی منفی اثر پڑے گا۔
