علی گڑھ مسلم یونیورسٹی (اے ایم یو) نے تعلیمی سیشن 2026-27 کے لیے مختلف کورسز کی داخلہ امتحانات کا شیڈول جاری کر دیا ہے۔ یونیورسٹی کے کنٹرولر آف ایگزامینیشنز کی جانب سے جاری نوٹیفکیشن کے مطابق یہ امتحانات علی گڑھ سمیت ملک کے مختلف امتحانی مراکز پر منعقد کیے جائیں گے۔
جاری کردہ پروگرام کے مطابق داخلہ امتحانات کا آغاز 12 اپریل 2026 سے ہوگا جبکہ آخری امتحان 7 جون 2026 کو منعقد کیا جائے گا۔ یونیورسٹی انتظامیہ کے مطابق اس مدت کے دوران گریجویشن، پوسٹ گریجویشن، پروفیشنل اور اسکول سطح کے کورسز کے لیے امتحانات لیے جائیں گے۔
شیڈول کے تحت 12 اپریل 2026 کو فیکلٹی آف آرٹس اینڈ سوشل سائنسز اور فیکلٹی آف انٹرنیشنل اسٹڈیز میں بی اے (آنرز)، فیکلٹی آف سائنس اینڈ لائف سائنسز میں بی ایس سی (آنرز) اور بی ایس سی (آنرز) ایگریکلچر کے داخلہ امتحانات ہوں گے۔
اس کے بعد 19 اپریل 2026 کو بی کام (آنرز)، بیچلر آف بزنس ایڈمنسٹریشن (بی بی اے) اور بی ٹیک/بی آرک کورسز کے داخلہ امتحانات منعقد کیے جائیں گے۔
26 اپریل 2026 کو یونیورسٹی سے وابستہ اسکولوں اور دیگر کورسز کے داخلہ امتحانات ہوں گے۔ ان میں سینئر سیکنڈری اسکول (سائنس اسٹریم)، سینئر سیکنڈری اسکول (ہیومینٹیز/کامرس اسٹریم)، ڈپلومہ اِن انجینئرنگ، برج کورس اور بی اے ایل ایل بی شامل ہیں۔
پوسٹ گریجویٹ اور پروفیشنل کورسز کے داخلہ امتحانات 7 جون 2026 کو منعقد کیے جائیں گے۔ اس روز مختلف ایم بی اے پروگرامز، ماسٹر آف پبلک ہیلتھ، ایم ایس ڈبلیو اور بی ایڈ کے داخلہ امتحانات لیے جائیں گے۔
یونیورسٹی انتظامیہ نے بتایا کہ تعلیمی سیشن 2026-27 کے لیے گائیڈ ٹو ایڈمیشنز اور درخواست فارم یکم فروری 2026 سے یونیورسٹی کی سرکاری ویب سائٹ پر دستیاب ہوں گے۔ امیدواروں سے اپیل کی گئی ہے کہ وہ داخلہ عمل سے متعلق تازہ ترین معلومات کے لیے ویب سائٹ پر باقاعدگی سے نظر رکھیں۔
یہ نوٹیفکیشن 24 جنوری 2026 کو جاری کیا گیا ہے اور یونیورسٹی کے تمام فیکلٹیز، شعبہ جات، کالجز، اسکولوں اور انتظامی یونٹس کو اس سے مطلع کر دیا گیا ہے۔
