بہار کے ضلع گیا میں ایک معمولی سی سائیکل ٹکراؤ پر احتجاج کرنا ایک دلت شخص کی جان لے بیٹھا۔ ٹکاری تھانہ علاقے کے گہرپور گاؤں میں دلت برادری سے تعلق رکھنے والے 55 سالہ مدھیش پاسوان کو مشتعل ہجوم نے بے رحمی سے پیٹ پیٹ کر قتل کر دیا۔ اس واقعے نے ایک بار پھر ریاست میں بڑھتے ہوئے موب لنچنگ اور دلتوں کے خلاف تشدد پر سنگین سوالات کھڑے کر دیے ہیں۔
پولیس کے مطابق یہ واقعہ جمعرات کی دوپہر پیش آیا۔ مدھیش پاسوان گاؤں میں موجود تھے کہ ایک سائیکل سوار ان سے ٹکرا گیا۔ ٹکر کے بعد جب مدھیش پاسوان نے اس پر احتجاج کیا تو تنازع بڑھ گیا۔ دیکھتے ہی دیکھتے سائیکل سوار کی حمایت میں 20 سے 25 افراد کا ہجوم جمع ہو گیا، جس نے لاٹھیوں اور لوہے کی سلاخوں سے مدھیش پاسوان پر حملہ کر دیا۔
حملے میں مدھیش پاسوان شدید زخمی ہو کر موقع پر ہی بے ہوش ہو گئے۔ اہل خانہ انہیں فوری طور پر ٹکاری سب ڈویژنل اسپتال لے گئے، جہاں ڈاکٹروں نے انہیں مردہ قرار دے دیا۔
واقعے کی خبر ملتے ہی مقتول کے اہل خانہ اور گاؤں والوں میں شدید غم و غصہ پھیل گیا۔ مقتول کے بیٹے سورج پاسوان نے الزام لگایا کہ ان کے والد نے صرف سائیکل کی ٹکر پر اعتراض کیا تھا، لیکن ہجوم نے انہیں پیٹ پیٹ کر مار ڈالا۔ مشتعل لوگوں نے ٹکاری سب ڈویژنل اسپتال کے قریب تقریباً ڈیڑھ گھنٹے تک سڑک جام کر دی اور ملزمان کی فوری گرفتاری کا مطالبہ کیا۔ حالات کے پیش نظر پولیس کو اضافی نفری تعینات کرنی پڑی۔
دن دہاڑے پیش آنے والے اس واقعے کے بعد گہرپور گاؤں اور آس پاس کے علاقوں میں خوف و ہراس کا ماحول ہے۔ مقامی لوگوں کا کہنا ہے کہ معمولی باتوں پر ہجوم کا مشتعل ہو جانا اور قانون کو اپنے ہاتھ میں لینا تشویشناک رجحان بنتا جا رہا ہے۔ یہ معاملہ واضح طور پر موب لنچنگ کے زمرے میں آتا ہے۔
ٹکاری تھانہ پولیس نے اس معاملے میں قتل کی ایف آئی آر درج کر لی ہے۔ ایس ڈی پی او سشانت کمار چنچل نے بتایا کہ کئی افراد کی شناخت کر لی گئی ہے اور کچھ کو حراست میں لے کر پوچھ گچھ کی جا رہی ہے۔ انہوں نے کہا کہ مارپیٹ کے سبب ہی شخص کی موت ہوئی ہے اور واقعے میں شامل تمام ملزمان کو جلد گرفتار کیا جائے گا۔
مقتول کا خاندان صدمے میں ہے اور انصاف کا مطالبہ کر رہا ہے۔ اہل خانہ نے انتظامیہ سے اپیل کی ہے کہ قصورواروں کے خلاف سخت سے سخت کارروائی کی جائے تاکہ آئندہ اس طرح کے واقعات کی تکرار نہ ہو۔
