بہار میں جرائم کے بڑھتے معاملات کے درمیان وزیرِ داخلہ و نائب وزیرِ اعلیٰ سمراٹ چودھری نے پہلے ہی بیان میں سخت موقف اختیار کرتے ہوئے جرائم پیشہ عناصر کو واضح انتباہ دے دیا ہے۔ انہوں نے کہا کہ “سُشاسن قائم کرنے کے لیے بے لگام مجرموں کے خلاف سخت اور ٹھوس کارروائی کی جائے گی۔ کسی کو بخشا نہیں جائے گا۔”

سمراٹ چودھری کے مطابق وزیرِ اعلیٰ نتیش کمار کی قیادت میں سُشاسن ماڈل پہلے کی طرح جاری رہے گا اور ریاست میں قانون و نظم کو ہر حال میں مضبوط بنایا جائے گا۔ وزیرِ داخلہ نے کہا کہ انہیں بی جے پی کی قیادت اور وزیراعلیٰ نتیش کمار کے اعتماد کے ساتھ محکمۂ داخلہ کی ذمہ داری ملی ہے اور وہ اسے پوری سختی کے ساتھ نبھائیں گے۔

ایک سوال کے جواب میں وزیرِ داخلہ نے یہ بھی کہا کہ “بہار پہلے سے ہی قانون و نظم کے لحاظ سے سخت ریاست ہے۔ یہاں جرائم پیشہ افراد کے لیے کوئی گنجائش نہیں۔ مجرم سمجھ لیں کہ بہار میں رہنے کا راستہ بند ہے، ریاست سے باہر جانا پڑے گا۔”

بیگوسرائے میں حالیہ دنوں پولیس اور ایس ٹی ایف کی مشترکہ کارروائیوں کو حکومت جرائم کے خلاف واضح پیغام کے طور پر دیکھ رہی ہے۔
ساحِب پور کمال تھانہ کے ملہی پور–شالیگرامی علاقے میں چھاپہ ماری کے دوران فائرنگ کے تبادلے میں ایک مجرم زخمی ہوا، جس کا علاج جاری ہے۔
دو روز قبل تیگھڑا میں بھی ایک انکاؤنٹر میں ایک مجرم زخمی ہوا تھا۔

بہار پولیس نے کارروائی کی تفصیلات سوشل میڈیا پلیٹ فارم “ایکس” پر جاری کرتے ہوئے بتایا کہ آپریشن کے دوران بھاری مقدار میں غیر قانونی اسلحہ اور دیگر سامان ضبط کیا گیا۔ برآمدگی میں شامل ہیں:

7 دیسی پسٹل

1 نیم تیار پسٹل

7 میگزین

₹3,70,000 نقد

970 بوتلیں غیر قانونی کف سیرپ

اسلحہ سازی کے اوزار اور دیگر سامان

محکمۂ داخلہ کے ذرائع کے مطابق وزیرِ داخلہ نے افسران کو واضح ہدایت دی ہے کہ کارروائی میں کسی بھی طرح کی کوتاہی یا نرمی برداشت نہیں کی جائے گی۔
سیاسی حلقوں میں سمراٹ چودھری کے بیان کو “سُشاسن کی واپسی” کے طور پر دیکھا جا رہا ہے، جبکہ پولیس محکمے کی سرگرمیاں بھی تیز ہوتی نظر آ رہی ہیں۔