انصاف ٹائمس ڈیسک
بہار اسمبلی انتخابات سے قبل سیمانچل کی سیاست میں تیزی آ گئی ہے۔ آل انڈیا مجلس اتحاد المسلمین (AIMIM) کے سربراہ اسدالدین اویسی منگل کو بہار پہنچ گئے ہیں۔ وہ بدھ 24 ستمبر سے اپنی ’’سیمانچل انصاف یاترا‘‘ کا آغاز کریں گے۔
یہ یاترا سیمانچل کے چار اضلاع — ارریہ، پورنیہ، کٹیہار اور کشن گنج — سے گزرے گی۔ یاترا کا آغاز کشن گنج کے رُوئی دھانسا میدان سے ہوگا۔ اویسی کے ساتھ پارٹی کے بہار صدر و رکن اسمبلی اخترالایمان اور دیگر سینئر رہنما بھی موجود رہیں گے۔
پارٹی ترجمان عادل حسن نے بتایا کہ یاترا کے دوران اویسی عوامی جلسوں سے خطاب کریں گے، عام لوگوں سے ملاقات کریں گے اور تنظیمی میٹنگوں میں بھی شریک ہوں گے۔ ان کا کہنا ہے کہ ’’مہاگٹھ بندھن اور این ڈی اے دونوں نے سیمانچل کو نظرانداز کیا ہے، لیکن AIMIM سیمانچل کے عوام کو انصاف اور ترقی دلانے کے لیے میدان میں اتری ہے۔‘‘
گزشتہ اسمبلی انتخابات میں اویسی کی پارٹی کو سیمانچل میں بڑی کامیابی ملی تھی اور پانچ نشستوں پر جیت حاصل ہوئی تھی، لیکن بعد میں چار اراکین اسمبلی آر جے ڈی میں شامل ہو گئے۔ اس بار بھی پارٹی نے مہاگٹھ بندھن سے اتحاد کی کوشش کی، مگر کوئی مثبت جواب نہیں ملا۔
راہل گاندھی کی ’’ووٹرس ادھیکار یاترا‘‘ اور تیجسوی یادو کی ’’بہار ادھیکار یاترا‘‘ کے بعد اب اویسی کی انٹری سے سیمانچل کی سیاست میں نیا موڑ آنے کا امکان ہے۔ مسلم اکثریتی اس خطے میں AIMIM پہلے ہی اپنی مضبوط گرفت قائم کر چکی ہے۔
اب دیکھنا ہوگا کہ اویسی کی ’’سیمانچل انصاف یاترا‘‘ اس انتخابی جنگ میں کس طرح کے نئے سیاسی سمیکرن کو جنم دیتی ہے۔
