انصاف ٹائمس ڈیسک
گجرات کی مائنارٹی کوآرڈینیشن کمیٹی (MCC) نے ریاستی حکومت کے اعلیٰ افسران کو ایک قانونی نوٹس بھیج کر وڈودرا میں حال ہی میں پیش آئے مبینہ پولیس آپریشن پر سخت اعتراض جتایا ہے۔ تنظیم کا الزام ہے کہ 26 اور 27 اگست کو پانی گیٹ علاقے میں گنیش وسرجن کے دوران گرفتار مسلم مردوں کو حراست میں اذیت دی گئی اور انہیں عوامی طور پر ذلیل و خوار کرتے ہوئے گھمایا گیا۔
میڈیا رپورٹس کے مطابق 27 اگست کو سوشل میڈیا پر سامنے آنے والی ویڈیوز اور تصاویر میں کئی ملزمان کو پولیس کی موجودگی میں سڑکوں پر مارچ کراتے ہوئے دیکھا گیا۔ پولیس نے اسے ’’ریکانسٹرکشن‘‘ کا حصہ قرار دیا، تاہم انسانی حقوق کی تنظیموں اور سماجی رہنماؤں نے اسے قیدیوں کے حقوق کی خلاف ورزی اور عوامی تذلیل قرار دیا۔
اس پر MCC کے کنوینر مجاہد نفیس نے نوٹس میں کہا ہے کہ پولیس کا یہ رویہ بھارتی آئین کے آرٹیکل 21 کی خلاف ورزی ہے، جو زندگی اور شخصی آزادی کی ضمانت دیتا ہے۔ ساتھ ہی سپریم کورٹ کے مشہور فیصلے D.K. Basu بمقابلہ ریاستِ مغربی بنگال (1997) میں جاری کردہ رہنما اصولوں کی بھی پامالی کی گئی ہے۔ یہ اصول حراست میں تشدد اور پولیس کے غلط استعمال کو روکنے کے لیے وضع کیے گئے تھے۔
نوٹس میں مطالبہ کیا گیا ہے کہ متعلقہ پولیس افسران کے خلاف محکمہ جاتی اور قانونی کارروائی کی جائے، ذمہ داروں پر ایف آئی آر درج ہو، متاثرین کو معاوضہ اور عدالتی معاونت فراہم کی جائے اور آئندہ ایسی وارداتوں کو روکنے کے لیے مؤثر اقدامات اٹھائے جائیں۔
معاملے میں MCC کا کہنا ہے کہ اس واقعے کو وسیع میڈیا کوریج اور عوامی تنقید کے باوجود اب تک نہ تو محکمہ جاتی انکوائری شروع ہوئی ہے اور نہ ہی کسی افسر کو سزا دی گئی ہے۔ یہی وجہ ہے کہ تنظیم نے اب قانونی نوٹس بھیج کر اعلیٰ حکام کو براہِ راست جواب دہ ٹھہرانے کی پہل کی ہے۔
انسانی حقوق کی تنظیموں اور مقامی سماجی رہنماؤں نے بھی اس معاملے میں شفاف اور غیرجانبدارانہ تحقیقات کا مطالبہ کیا ہے۔ اس واقعے نے ریاست میں پولیس کے رویے اور اقلیتوں کی سلامتی پر سنگین سوالات کھڑے کر دیے ہیں۔
