آل انڈیا مجلس اتحاد المسلمین نے بہار کے سیمانچل خطے کو خصوصی درجہ دینے کا مطالبہ کرتے ہوئے مرکزی حکومت سے فوری مداخلت کی اپیل کی ہے۔ پارٹی کے قومی ترجمان ایڈووکیٹ عادل حسن نے کہا کہ سیمانچل طویل عرصے سے تعلیمی، صنعتی اور بنیادی ڈھانچے کی ترقی میں نظرانداز کیا جاتا رہا ہے، جس کے باعث علاقائی عدم توازن میں اضافہ ہوا ہے۔
انہوں نے کہا کہ سیمانچل، جس میں کشن گنج، کٹیہار، پورنیہ اور ارریہ اضلاع شامل ہیں، اعلیٰ تعلیم اور روزگار کے مواقع کی کمی سے دوچار ہے۔ اس صورتحال کے پیش نظر علاقے میں طبی کالج اور انجینئرنگ کالج کے قیام کو ناگزیر قرار دیا گیا، تاکہ مقامی نوجوانوں کو تعلیم کے لیے دیگر ریاستوں کا رخ نہ کرنا پڑے۔
عادل حسن نے علی گڑھ مسلم یونیورسٹی کے کشن گنج مرکز کے لیے خاطر خواہ مرکزی فنڈ فراہم کرنے کا مطالبہ بھی کیا۔ ان کا کہنا تھا کہ اگر اس مرکز کو مناسب وسائل اور بنیادی سہولیات فراہم کی جائیں تو سیمانچل کے طلبہ کو اعلیٰ تعلیم کے بہتر مواقع میسر آ سکتے ہیں اور علاقے میں تعلیمی ماحول مضبوط ہوگا۔
ترجمان نے سیمانچل کے لیے خصوصی معاشی پیکیج کا مطالبہ کرتے ہوئے کہا کہ صنعتوں کے قیام اور مقامی سطح پر روزگار کے مواقع پیدا کرنے کے لیے علیحدہ فنڈ مختص کیا جانا چاہیے۔ ان کے مطابق سرمایہ کاری کی کمی کے باعث علاقے کے نوجوان بڑے شہروں کی طرف ہجرت کرنے پر مجبور ہیں۔
سماجی انصاف کے حوالے سے انہوں نے سورجپوری برادری کو مرکزی او بی سی فہرست میں شامل کر کے ریزرویشن دینے کا مطالبہ بھی دہرایا۔ ان کا کہنا تھا کہ سماجی و تعلیمی طور پر پسماندہ طبقات کو آئینی حقوق سے مستفید ہونا چاہیے۔
سیمانچل میں ہر سال آنے والے سیلاب کا ذکر کرتے ہوئے عادل حسن نے کہا کہ اس سے عام زندگی اور زراعت بری طرح متاثر ہوتی ہے۔ انہوں نے مرکزی حکومت سے مستقل سیلاب کنٹرول منصوبہ، پشتوں کی مضبوطی اور طویل مدتی آبی انتظامی پالیسی نافذ کرنے کا مطالبہ کیا۔
مجلس اتحاد المسلمین نے امید ظاہر کی ہے کہ مرکزی حکومت علاقائی توازن اور ترقی کو مدنظر رکھتے ہوئے سیمانچل کے مفاد میں مثبت فیصلہ کرے گی۔
