پٹنہ ہائی کورٹ کو نیا مستقل چیف جسٹس مل گیا ہے۔ حکومتِ ہند کی وزارتِ قانون و انصاف نے اڈیشہ ہائی کورٹ کے سینئر جج جسٹس سنگم کمار ساہو کو پٹنہ ہائی کورٹ کا چیف جسٹس مقرر کرنے کا نوٹیفکیشن جاری کر دیا ہے۔ صدرِ جمہوریہ دروپدی مرمو نے آئین کے تحت یہ تقرری کی ہے، جو ان کے عہدہ سنبھالنے کی تاریخ سے نافذ العمل ہوگی۔
یہ تقرری سپریم کورٹ کالجیم کی سفارش پر کی گئی ہے۔ کالجیم نے 18 دسمبر 2025 کو منعقدہ اجلاس میں جسٹس سنگم کمار ساہو کو پٹنہ ہائی کورٹ کا 47واں چیف جسٹس مقرر کرنے کی سفارش مرکزی حکومت کو ارسال کی تھی۔ یہ سفارش ملک کی مختلف ہائی کورٹس میں چیف جسٹس کے خالی عہدوں کو پُر کرنے کے عمل کے تحت کی گئی تھی۔
اسی اجلاس میں کالجیم نے اتراکھنڈ، جھارکھنڈ، سکم اور میگھالیہ ہائی کورٹس کے لیے بھی نئے چیف جسٹس کے ناموں کی سفارش کی تھی۔ ان میں سے بعض تقرریوں پر نوٹیفکیشن جاری ہو چکا ہے، جبکہ کچھ معاملات میں عمل جاری ہے۔ پٹنہ ہائی کورٹ میں طویل عرصے سے مستقل چیف جسٹس کی تقرری کا انتظار تھا، جو اب ختم ہو گیا ہے۔
نوٹیفکیشن جاری ہونے کے بعد بہار کے گورنر جسٹس سنگم کمار ساہو کو عہدے اور رازداری کا حلف دلائیں گے، جس کے بعد وہ باضابطہ طور پر پٹنہ ہائی کورٹ کے چیف جسٹس کے طور پر ذمہ داریاں سنبھالیں گے۔ اس وقت تک پٹنہ ہائی کورٹ میں قائم مقام چیف جسٹس جسٹس سدھیر سنگھ فرائض انجام دے رہے تھے۔
جسٹس سنگم کمار ساہو کی پیدائش اڈیشہ میں ہوئی۔ انہوں نے نوا بازار ہائی اسکول سے میٹرک کی تعلیم حاصل کی۔ اس کے بعد اسٹیورٹ سائنس کالج، کٹک سے آئی ایس سی اور بی ایس سی کی ڈگریاں حاصل کیں۔ انہوں نے اُتکل یونیورسٹی سے ایم اے (انگریزی اور اوڑیہ) اور لا کالج، کٹک سے ایل ایل بی کی تعلیم مکمل کی۔
انہوں نے 26 نومبر 1989 کو اڈیشہ اسٹیٹ بار کونسل میں بطور وکیل اندراج کرایا۔ وکالت کے دوران ان کا بنیادی میدان فوجداری قانون اور سروس سے متعلق مقدمات رہا۔ انہوں نے اڈیشہ کے مختلف ضلعی عدالتوں، اڈیشہ ہائی کورٹ، کنزیومر فورمز، اسٹیٹ ایڈمنسٹریٹو ٹریبونل (SAT) اور سینٹرل ایڈمنسٹریٹو ٹریبونل (CAT) میں وسیع پیمانے پر پریکٹس کی۔
طویل اور کامیاب وکالتی کیریئر کے بعد 2 جولائی 2014 کو انہیں اڈیشہ ہائی کورٹ کا جج مقرر کیا گیا۔ وہاں انہوں نے کئی اہم مقدمات کی سماعت کی اور متوازن عدالتی رویے اور حساس فیصلوں کے لیے شناخت قائم کی۔
جسٹس سنگم کمار ساہو کو ایک تجربہ کار، متوازن اور سخت گیر جج کے طور پر جانا جاتا ہے۔ ان کی تقرری سے پٹنہ ہائی کورٹ میں زیر التوا مقدمات کے تیز رفتار تصفیے، عدالتی انتظامیہ کے استحکام اور ادارہ جاتی نظام کو مضبوطی ملنے کی امید ظاہر کی جا رہی ہے۔ قانونی ماہرین کے مطابق یہ تقرری بھارتی عدلیہ میں سینیارٹی، شفافیت اور اہلیت کے اصولوں کو بھی اجاگر کرتی ہے۔
پٹنہ ہائی کورٹ کو نئے چیف جسٹس کی حیثیت سے جسٹس ساہو کی قیادت سے عدالتی عمل میں نئی رفتار اور اعتماد کی توقع ہے۔
