سوشل ڈیموکریٹک پارٹی آف انڈیا نے اعلان کیا ہے کہ پارٹی کا اعلیٰ ترین نمائندہ ادارہ چھٹی قومی نمائندہ کونسل (نیشنل ریپریزنٹیٹو کونسل –) کا اجلاس 20 اور 21 جنوری 2026 کو کرناٹک کے شہر منگلورو میں منعقد ہوگا۔ یہ دو روزہ اجلاس پارٹی کی تنظیمی سمت اور سیاسی حکمتِ عملی کے تعین میں نہایت اہم کردار ادا کرے گا۔
پیر کے روز بنگلور میں منعقدہ ایک پریس کانفرنس سے خطاب کرتے ہوئے سوشل ڈیموکریٹک پارٹی آف انڈیا کے سینئر رہنماؤں نے بتایا کہ اس کونسل میں ملک بھر سے منتخب مندوبین شرکت کریں گے، جو پارٹی کی ہمہ گیر قومی موجودگی اور اس کے اندرونی جمہوری ڈھانچے کی عکاسی کرتا ہے۔
رہنماؤں کے مطابق اجلاس کے اہم ایجنڈوں میں نئی نیشنل ورکنگ کمیٹی اور اس کے عہدیداران کا انتخاب شامل ہے، جو آئندہ مدت میں پارٹی کی قیادت کریں گے۔ اس کے ساتھ ہی پارٹی کی مدتی رپورٹ پیش کی جائے گی، جس میں تنظیمی سرگرمیوں، سیاسی جدوجہد اور عوامی مسائل سے متعلق پارٹی کے اقدامات کی تفصیل شامل ہوگی۔ رپورٹ پر تفصیلی بحث و تمحیص بھی کی جائے گی۔
پریس کو بریفنگ دیتے ہوئے رہنماؤں نے کہا کہ کونسل میں ملک کی موجودہ سیاسی صورتحال کا جامع جائزہ لیا جائے گا اور سوشل ڈیموکریٹک پارٹی آف انڈیا کے سیاسی لائحۂ عمل، نظریاتی سمت اور مستقبل کی حکمتِ عملی پر سنجیدہ غور و فکر کیا جائے گا۔ ان مباحث کا مقصد قومی سطح پر پارٹی کی سیاسی مداخلت کو مزید مؤثر بنانا اور سماجی انصاف، آئینی اقدار اور جامع سیاست کے ایجنڈے کو مضبوط کرنا ہے۔
رہنماؤں نے اس بات پر زور دیا کہ چھٹی قومی نمائندہ کونسل سوشل ڈیموکریٹک پارٹی آف انڈیا کے لیے ایک اہم سنگِ میل ہے، جو پارٹی کے جمہوری عمل، سماجی انصاف اور محروم و حاشیہ بردار طبقات کی آواز کو مضبوط کرنے کے عزم کی تجدید کرتی ہے۔
اس پریس کانفرنس سے خطاب کرنے والوں میں محمد الیاس تھمبے (قومی جنرل سکریٹری)، ریاض فرنگی پیٹ (قومی سکریٹری)، پُٹّننجیا (کرناٹک ریاستی نائب صدر) اور افسر کوڈلی پیٹ (کرناٹک ریاستی جنرل سیکریٹری) شامل تھے۔
