اِنصاف ٹائمس ڈیسک
راجستھان کے شہر کوٹا میں گوشت کی دکانوں پر چل رہی سخت کارروائی کے درمیان ہائی کورٹ سے گوشت کے تاجروں کو بڑی راحت ملی ہے۔ بغیر لائسنس اور صفائی کے ضوابط کی خلاف ورزی کے نام پر بند کی جا رہی دکانوں کے خلاف گوشت فروشوں نے راجستھان ہائی کورٹ میں عرضی داخل کی، جہاں عدالت نے کوئی تادیبی کارروائی نہ کرنے اور تاجروں کو اپنا کاروبار جاری رکھنے کی اجازت دی۔
اس مقدمے میں ایڈووکیٹ انصار اندوری، ایڈووکیٹ اجیت کسوا اور ایڈووکیٹ اجے کمار نے مؤثر انداز میں دلائل دیتے ہوئے عدالت کو بتایا کہ بیشتر دکانوں کے پاس لائسنس موجود ہیں، اور بغیر نوٹس یا قانونی کارروائی کے ان پر زبردستی کارروائی کی جا رہی ہے۔ وکلاء نے عدالت کے سامنے مؤقف رکھا کہ یہ اقدام تاجروں کے بنیادی حقوق اور روزگار کے حق کی خلاف ورزی ہے۔
عدالت نے ان دلائل کو تسلیم کرتے ہوئے حکم دیا کہ انتظامیہ فی الحال کسی بھی گوشت فروش کے خلاف تادیبی کارروائی نہیں کرے گی اور وہ اپنا کاروبار بلا رکاوٹ جاری رکھ سکتے ہیں۔
گزشتہ اتوار کو کوٹا سرکٹ ہاؤس میں منعقدہ ایک اعلیٰ سطحی میٹنگ میں مقامی ایم ایل اے سندیپ شرما نے صحت محکمہ اور ضلعی انتظامیہ کو سخت ہدایت دی تھی کہ بغیر لائسنس اور صفائی کے اصولوں کی خلاف ورزی کرنے والی تمام گوشت کی دکانیں فوری طور پر بند کی جائیں۔ ان کا کہنا تھا کہ ایسی دکانیں نہ صرف عوامی جذبات کو مجروح کر رہی ہیں بلکہ صحت عامہ کے لیے بھی خطرہ ہیں۔
ایم ایل اے نے مزید کہا کہ راجستھان ملک کی سب سے زیادہ سبزی خور ریاست ہے اور یہاں کے لوگ مذہبی جذبات کے تحت سبزی خوری کو ترجیح دیتے ہیں۔ انہوں نے یہ بھی خدشہ ظاہر کیا کہ چوری شدہ جانوروں کا گوشت ان دکانوں پر فروخت کیا جا رہا ہے، جو کہ نہ صرف غیر قانونی ہے بلکہ مویشی پالنے والوں کے لیے بھی نقصان دہ ہے۔
ہائی کورٹ کے حکم کے بعد انتظامیہ کو فوری طور پر کوئی سخت کارروائی کرنے سے روک دیا گیا ہے، جس سے گوشت فروشوں کو بڑی راحت ملی ہے۔ تاہم، آئندہ سماعت میں عدالت دونوں فریقوں کی مکمل بات سن کر حتمی فیصلہ دے گی۔
دریں اثنا، کوٹا کے گوشت تاجروں اور کاروباری طبقے نے عدالت کے فیصلے کو "آئینی اور انصاف پر مبنی” قرار دیتے ہوئے سراہا ہے۔