اِنصاف ٹائمس ڈیسک
لوک سبھا میں قائد حزبِ اختلاف اور کانگریس کے سینئر رہنما راہل گاندھی نے جمعرات کے روز پٹنہ کے سٹی سینٹر مال میں واقع پی وی آر سنیما میں فلم پھولے کی ایک خصوصی اسکریننگ میں شرکت کی۔ یہ فلم 19ویں صدی کے دو عظیم سماجی مصلحین، جیوتی راؤ پھولے اور ساوتری بائی پھولے کی زندگی اور جدوجہد پر مبنی ہے۔
اس اسکریننگ میں دلت، پسماندہ طبقات کے شہری، سول سوسائٹی کے نمائندے، سوشل میڈیا پر اثر رکھنے والے نوجوان اور کانگریس کارکنان شامل تھے۔
راہل گاندھی کے سینما ہال میں داخل ہوتے ہی “جے بھیم” کے نعروں سے ان کا پرتپاک استقبال کیا گیا۔
فلم ختم ہونے کے بعد راہل گاندھی نے شرکاء سے گفتگو کرتے ہوئے کہا “سماجی انصاف آج کے ہندوستان کی سب سے بڑی ضرورت ہے، اور اس تحریک کو کوئی نہیں روک سکتا۔”
اس پروگرام کا انعقاد بہار پردیش کانگریس کمیٹی نے کیا تھا، جس کے لیے تقریباً 400 خصوصی پاس جاری کیے گئے، جن پر راہل گاندھی اور بہار کانگریس صدر راجیش رام کی تصاویر چھپی ہوئی تھیں۔
تاہم، اس موقع پر کچھ تنازعات بھی سامنے آئے۔ متعدد افراد نے شکایت کی کہ انہیں پاس ہونے کے باوجود سنیما ہال میں داخل نہیں ہونے دیا گیا۔
ایک مدعو شخص نے کہا “میں مالی سماج سے تعلق رکھتا ہوں، جو جیوتی راؤ پھولے اور رامابائی پھولے کے وارث ہیں، پھر بھی مجھے اندر جانے سے روک دیا گیا۔ یہ سراسر ناانصافی ہے۔”
اس سے قبل، راہل گاندھی نے دربھنگہ میں منعقد تعلیمی انصاف مکالمہ میں دو ہزار سے زائد او بی سی، ای بی سی، ایس سی اور اقلیتی طلبہ سے ملاقات کی، جہاں انہوں نے ذات پر مبنی مردم شماری کی حمایت کرتے ہوئے وزیر اعظم نریندر مودی پر تنقید کی۔
راہل گاندھی نے کہا “وزیر اعظم کو ذات گننے کا فیصلہ صرف محروم طبقات کے خوف سے لینا پڑا، کیونکہ یہی لوگ ہندوستان کی اصل طاقت ہیں۔”
راہل گاندھی کی یہ سرگرمیاں بہار میں آئندہ اسمبلی انتخابات سے قبل کانگریس کی سماجی انصاف پر مبنی سیاست کو مضبوط کرنے کی کوشش سمجھی جا رہی ہیں۔