انصاف ٹائمس ڈیسک
مظفرپور کے کٹرہ بلاک کے ٹیکوارہ گاؤں میں 40–50 سالوں سے رہائش پذیر بے زمین غریب خاندانوں کو بے دخل کرنے کے انتظامی احکامات کے خلاف آج بھاکپا-مالے اور کھیگراس نے زوردار احتجاج کیا۔ آر وائی اے کے قومی صدر اور مالے کے سابق امیدوار آفتاب عالم کی قیادت میں ضلعی مجسٹریٹ دفتر کے سامنے ایک روزہ دھرنا منعقد کیا گیا۔
بھاکپا-مالے اورائی–کٹرہ بلاک کے سکریٹری منوج کمار یادو نے کہا کہ غریب خاندانوں پر بلڈوزر چلانے کا حکم براہِ راست “ہٹلرشاہی” ہے۔ انہوں نے انتظامیہ اور بی جے پی رکن اسمبلی پر غریبوں کو بے گھر کرنے کی سازش کا الزام عائد کیا۔
دھرنے سے خطاب کرتے ہوئے آفتاب عالم نے کہا کہ ٹیکوارہ گاؤں کے درجنوں غریب خاندان نسلوں سے سرکاری زمین پر رہائش پذیر ہیں۔ انہوں نے الزام لگایا کہ تین سال قبل ان خاندانوں کی زمین پر ماڈل تھانہ تعمیر کیا گیا اور اب بجلی پاور ہاؤس کے نام پر انہیں بے دخل کرنے کی منصوبہ بندی کی جا رہی ہے۔ عالم نے کہا، “یہ مکمل منصوبہ مقامی بی جے پی رکن اسمبلی اور انتظامیہ کی ملی بھگت سے ترتیب دیا جا رہا ہے۔”
کھیگراس کے ریاستی سیکریٹری شتروگھن سہنی نے کہا کہ غریبوں کی بجلی کاٹ کر ان کی زندگی کو اندھیروں میں دھکیل دیا گیا، جس کے نتیجے میں حال ہی میں ایک بچی سانپ کے کاٹنے کے واقعے کا شکار ہوئی۔ انہوں نے اسے انتظامیہ کی غیر انسانی اور غریب مخالف ذہنیت قرار دیا۔
بھاکپا-مالے ضلعی کمیٹی کے رکن پرشورام پٹھک نے خبردار کیا کہ اگر انتظامیہ نے بلڈوزر چلانے کی جرات کی، تو اس کا جواب پورے بہار کی عوام دے گی۔
دھرنے میں موجود متاثرہ خاندانوں نے بی جے پی رکن اسمبلی اور نتیش-مودی حکومت پر “بلڈوزر راج” تھوپنے کا الزام عائد کرتے ہوئے کہا کہ یہ جدوجہد صرف ٹیکوارہ گاؤں تک محدود نہیں، بلکہ پورے بہار کے دلت–مہادلّت، پسماندہ اور محنت کش عوام کی لڑائی ہے۔
دھرنے میں شامل رہنماؤں نے ضلعی مجسٹریٹ کو تحریری مطالبات پیش کیے اور واضح کیا کہ اگر غریبوں پر بلڈوزر چلایا گیا تو حکومت کو سیاسی اور عوامی احتجاج کا سامنا کرنا پڑے گا۔
دھرنے میں بھاکپا-مالے اورائی–کٹرہ بلاک کے سیکریٹری منوج کمار یادو، آفتاب عالم، کھیگراس کے ریاستی سکریٹری شتروگھن سہنی، امریش رائے، بٹوہی رائے، وشوناتھ رائے، جولی دیوی، دیوو دیوی اور بھاکپا-مالے ضلعی کمیٹی کے رکن پرشورام پٹھک سمیت دیگر رہنماؤں نے خطاب کیا۔
