اتر پردیش کے ضلع مظفرنگر میں اذان کے معاملے پر مدینہ مسجد کے مؤذن محمد عرفان کے ساتھ ایک پولیس اہلکار کی مبینہ مارپیٹ اور توہین آمیز، اسلاموفوبک ریمارکس نے شدید تنازع کھڑا کر دیا ہے۔ واقعے کی سی سی ٹی وی فوٹیج سامنے آنے کے بعد مسلم تنظیموں اور شہری حقوق کے کارکنوں نے سخت ناراضگی ظاہر کرتے ہوئے اسے مذہبی آزادی پر براہِ راست حملہ قرار دیا ہے۔ ساتھ ہی ملزم سب انسپکٹر وِنود چوہدری کی فوری گرفتاری اور سخت کارروائی کا مطالبہ بھی زور پکڑ رہا ہے۔
مکتوب میڈیا کی رپورٹ کے مطابق، واقعہ سول لائنس تھانہ علاقے کی مدینہ مسجد کا ہے جہاں فجر کی اذان کے بعد ڈیوٹی پر موجود پولیس اہلکاروں نے مؤذن عرفان کو مبینہ طور پر تشدد کا نشانہ بنایا، پھر غیر قانونی طور پر تھانے لے جا کر کئی گھنٹے حراست میں رکھا۔
مؤذن عرفان کا کہنا ہے کہ تھانے کے اندر سب انسپکٹر چوہدری نے ان سے توہین آمیز لہجے میں کہا “اذان دینے کا اتنا شوق ہے تو پاکستان چلے جاؤ!”
وکیل جاوید نے اس واقعے کو آئینی حقوق کی کھلی خلاف ورزی قرار دیتے ہوئے کہا “یہ صرف مارپیٹ کا معاملہ نہیں بلکہ یہ غیر قانونی حراست اور فرقہ وارانہ بدسلوکی کی واضح مثال ہے۔ بغیر کسی جرم کے ایک شہری کو اس کی مذہبی عبادت کی وجہ سے تشدد کا نشانہ بنانا اور ‘پاکستان جاؤ’ کہنا پولیس فورس میں موجود تعصب کو ظاہر کرتا ہے۔ یہ افسر کے خلاف سنگین فوجداری مقدمہ درج کرنے کے لائق ہے۔”
واقعے کے بعد جمعیت علمائے ہند کی قیادت میں مسلم تنظیموں کا ایک وفد فوری طور پر مسجد پہنچا اور مؤذن عرفان سے ملاقات کی۔
وفد نے بعد ازاں سینئر سپرنٹنڈنٹ آف پولیس کو ایک تحریری شکایت دیتے ہوئے مطالبہ کیا ہے کہ:
سب انسپکٹر وِنود چودھری کو فوراً معطل کیا جائے۔
ان کے خلاف مناسب فوجداری دفعات کے تحت مقدمہ درج کیا جائے۔
واقعے کی غیر جانبدارانہ محکمہ جاتی تحقیقات کرائی جائے۔
مقامی برادری نے خبردار کیا ہے کہ اگر پولیس انتظامیہ نے فوری اور مؤثر کارروائی نہیں کی تو اس سے پولیس اور اقلیتی برادری کے درمیان عدم اعتماد مزید گہرا ہوگا، جس کا براہِ راست اثر امن و امان کی صورتحال پر پڑے گا۔
