انصاف ٹائمس ڈیسک
سوشل ڈیموکریٹک پارٹی آف انڈیا (SDPI) نے یونیورسٹی آف سائنس اینڈ ٹیکنالوجی، میگھالیہ (USTM) کے چانسلر محبوب الحق کی گرفتاری کی سخت مذمت کی ہے۔ آسام پولیس نے انہیں جمعہ کے روز شری بھومی ضلع کے پاتھارکانڈی علاقے میں سینٹرل پبلک اسکول میں سی بی ایس ای جماعت 12ویں کے فزکس امتحان کے دوران پیدا ہونے والی مبینہ "قانون و نظم و نسق” کی صورتحال کے سبب گرفتار کیا۔
محبوب الحق، جو یونیورسٹی آف سائنس اینڈ ٹیکنالوجی، میگھالیہ (USTM) اور اسے چلانے والے ایجوکیشن اینڈ ریسرچ ڈیولپمنٹ (ERD) کے بانی ہیں، آسام کے وزیر اعلیٰ ہمنتا بسوا شرما کے نشانے پر رہے ہیں۔ بی جے پی کے سخت گیر مسلم مخالف رہنماؤں میں شامل شرما نے محبوبالحق پر ‘سیلاب جہاد’ کا الزام لگایا تھا۔ انہوں نے دعویٰ کیا تھا کہ میگھالیہ کے ری-بھوئی ضلع میں واقع USTM کیمپس میں تعمیراتی کام اور جنگلات کی کٹائی کے سبب گوہاٹی میں سیلاب آیا۔
ایس.ڈی.پی.آئی نے محبوب الحق کی گرفتاری کو سنگھ پریوار کے مسلم مخالف ایجنڈے کا حصہ قرار دیا ہے اور کہا ہے کہ یہ محبوب الحق کے تعلیمی خدمات کو ختم کرنے کی کوشش ہے جو وہ معاشرے، خاص طور پر مسلم کمیونٹی کے لیے انجام دے رہے ہیں۔ پارٹی نے آسام حکومت کی طرف سے لگائے گئے جھوٹے الزامات کے تحت گرفتار کیے گئے محبوب الحق کی فوری اور غیر مشروط رہائی کا مطالبہ کیا ہے۔
ایس.ڈی.پی.آئی کے قومی نائب صدر ایڈووکیٹ شرف الدین احمد نے بیان جاری کرتے ہوئے کہا کہ یہ گرفتاری آسام حکومت کی من مانی اور تعلیم مخالف ذہنیت کو ظاہر کرتی ہے۔ انہوں نے کہا کہ حکومت کو محبوب الحق کے خلاف جھوٹے الزامات کو ختم کرکے انہیں فوری طور پر رہا کرنا چاہیے۔
یہ معاملہ آسام حکومت کی اقلیتی مخالف پالیسیوں کو بے نقاب کرتا ہے اور اس بات کو اجاگر کرتا ہے کہ کس طرح مسلم تعلیمی ماہرین اور اداروں کو نشانہ بنایا جا رہا ہے۔