بہار کی سیاست میں نئے سال کے آغاز پر نتیش کمار کے بیٹے نشانت کمار کی سیاسی انٹری کو لے کر سیاسی ہلچل تیز ہو گئی ہے۔ نالندہ سے جے ڈی یو کے رکن پارلیمان کوشلندرا کمار نے واضح طور پر کہا ہے کہ پارٹی کو مضبوط بنانے اور آگے بڑھانے کے لیے نشانت کو ذمہ داری دی جانی چاہیے۔
رکن پارلیمان کوشلندر کمار نے میڈیا سے بات کرتے ہوئے کہا، “نتیش کمار نے پچھلے 20 سالوں میں جو کام کیا ہے، وہ پارٹی کی سب سے بڑی سرمایہ کاری ہے۔ اگر نشانت سیاست میں نہیں آتے تو پارٹی کمزور ہو سکتی ہے۔ عوام چاہتے ہیں کہ نشانت آگے آئیں اور پارٹی کی قیادت سنبھالیں۔”
انہوں نے مزید کہا کہ نشانت نوجوان، پڑھے لکھے اور اخلاقی طور پر قابل تقلید ہیں۔ کسی بھی عہدے پر آنے کے بعد وہ پارٹی کے لیے مفید ثابت ہوں گے۔ تاہم انہوں نے واضح کیا کہ فی الحال انہیں وزیر اعلیٰ نہیں بنایا جانا چاہیے، لیکن پارٹی کی قیادت ان کے ہاتھ میں ہونی چاہیے۔
پٹنہ اور نالندہ سمیت کئی علاقوں میں نشانت کے حق میں پوسٹر اور بینر نظر آئے، جن پر لکھا تھا، “اگلی نسل کا مستقبل سنواریں گے نشانت کمار۔” اس سے واضح ہوتا ہے کہ پارٹی کارکن اور عوام دونوں ان کی سیاسی شمولیت کی حمایت کر رہے ہیں۔
تجزیہ کاروں کا کہنا ہے کہ یہ صرف خاندانی یا پارٹی کے اندرونی معاملات کی بات نہیں، بلکہ نوجوان قیادت اور تنظیمی مستقبل سے جڑا اہم مسئلہ بن گیا ہے۔ 2025 کے اسمبلی انتخابات میں این ڈی اے کی شاندار فتح کے بعد یہ بحث اور بھی زیادہ معنی خیز ہو گئی ہے۔
