اِنصاف ٹائمس ڈیسک
جہاں ایک طرف لوگ ماں باپ کی موت پر سوگ میں ڈوب جاتے ہیں، وہیں بہار کے ضلع جموئی سے ایک چونکا دینے والا اور شرمناک واقعہ سامنے آیا ہے۔ یہاں ایک بیٹے نے اپنے والد کے انتقال پر سوگ منانے کے بجائے فحاشی کا تماشا لگا دیا۔ سوشل میڈیا پر وائرل ہو رہے ویڈیو میں صاف دیکھا جا سکتا ہے کہ آخری رسومات کے دن ہی بیٹے نے ’لونڈا ڈانس‘ کا انتظام کروایا، جہاں بھوجپوری گانوں پر رقاصاؤں نے فحش انداز میں ناچ پیش کیا۔
کیا ہے معاملہ؟
یہ واقعہ جموئی ضلع کے لکشمی پور پرکھنڈ کے ایک گاؤں کا بتایا جا رہا ہے۔ مرنے والے بزرگ کی لاش ابھی گھر پر ہی رکھی تھی، اور اسی وقت بیٹے نے ڈی جے بلا کر بھوجپوری گانوں کی تیز آواز پر ناچ گانے کا اہتمام کیا۔ نہ صرف گاؤں والے بلکہ خود بیٹا بھی اس تماشے سے محظوظ ہوتا دکھائی دیا۔ یہ سب ویڈیو میں قید ہو گیا، جو اب سوشل میڈیا پر وائرل ہو رہا ہے۔
گاؤں میں غصہ، انتظامیہ بھی متحرک
واقعہ کے بعد گاؤں والوں میں سخت ناراضگی پائی جا رہی ہے۔ کئی افراد نے اسے روایت اور حساسیت کا مذاق قرار دیا۔ وہیں، انتظامیہ نے بھی وائرل ویڈیو کو سنجیدگی سے لیتے ہوئے تفتیش شروع کر دی ہے۔ ذرائع کے مطابق، مقامی تھانہ پولیس ویڈیو کی تصدیق میں مصروف ہے اور قصورواروں پر کارروائی کی تیاری کی جا رہی ہے۔
معاشرتی زوال کا آئینہ
یہ واقعہ صرف ایک شخص کی عزت کا مسئلہ نہیں بلکہ پورے معاشرے کی گرتی اقدار کی علامت بن کر ابھری ہے۔ سوال یہ ہے کہ کیا معاشرتی اقدار، حساسیت اور روایت اب صرف کتابوں میں رہ گئی ہیں؟