اسرائیل اور لبنان کی مسلح تنظیم حزب اللہ کے درمیان جاری تصادم اتوار کو مزید شدت اختیار کر گیا۔ اسرائیلی فوج نے بیروت کے جنوبی مضافات سمیت لبنان کے کئی علاقوں پر فضائی حملے کیے، جبکہ حزب اللہ نے جوابی کارروائی میں اسرائیل کے شمالی اور وسطی حصوں پر راکٹ اور ڈرون حملے کیے۔
عینی شاہدین کے مطابق دارالحکومت بیروت کے جنوبی مضافاتی علاقے داحیہ میں اسرائیلی حملوں کے بعد کئی عمارتوں سے دھوئیں کے بڑے بڑے بادل اٹھتے دکھائی دیے۔ یہ علاقہ حزب اللہ کا اہم گڑھ سمجھا جاتا ہے۔ اسرائیلی فوج کا کہنا ہے کہ ان حملوں میں تنظیم سے منسلک مالیاتی اور دیگر مراکز کو نشانہ بنایا گیا۔
اسی دوران اسرائیل نے دارالحکومت کے ساحلی علاقے روشیہ (راؤچے) میں واقع ایک ہوٹل کے کمرے پر ڈرون حملہ کیا۔ لبنان کے محکمہ صحت کے حکام کے مطابق اس حملے میں کم از کم چار افراد ہلاک اور دس دیگر زخمی ہو گئے۔
دوسری جانب حزب اللہ نے اسرائیل کے خلاف اپنی جوابی کارروائی تیز کر دی ہے۔ لبنان سے داغے گئے متعدد راکٹ اسرائیل کے شمالی اور بعض وسطی علاقوں میں گرے، جس کے بعد کئی شہروں میں خطرے کے سائرن بج اٹھے اور لوگوں کو محفوظ پناہ گاہوں میں جانا پڑا۔
سرحدی علاقوں میں بھی دونوں فریقوں کے درمیان جھڑپیں جاری ہیں۔ حزب اللہ کا کہنا ہے کہ اس کے جنگجو سرحد کے قریب اسرائیلی فوجیوں کے ساتھ جھڑپوں میں مصروف ہیں۔ ادھر اسرائیلی فوج نے تصدیق کی ہے کہ جنوبی لبنان میں لڑائی کے دوران اس کے دو فوجی ہلاک ہو گئے ہیں۔
اس دوران لبنان میں انسانی بحران بھی شدت اختیار کرتا جا رہا ہے۔ ملک کی وزارتِ سماجی امور کے مطابق تصادم دوبارہ شروع ہونے کے بعد سے اب تک پانچ لاکھ سے زائد افراد بے گھر ہو چکے ہیں۔ ان میں بڑی تعداد سرکاری پناہ گاہوں، اسکولوں اور اسٹیڈیموں میں رہ رہی ہے۔
لبنان کے وزیر اعظم نواف سلام نے کہا کہ ان کا ملک ایک تباہ کن جنگ میں گھسیٹ لیا گیا ہے، جسے اس نے نہ چاہا تھا اور نہ ہی منتخب کیا تھا۔ انہوں نے خبردار کیا کہ بڑے پیمانے پر ہونے والی نقل مکانی اور مسلسل حملے ملک کے لیے سنگین انسانی اور سیاسی بحران پیدا کر سکتے ہیں۔
تجزیہ کاروں کے مطابق بیروت پر بڑھتی بمباری، سرحدی علاقوں میں زمینی جھڑپیں اور دونوں جانب سے ہونے والے راکٹ حملے اس خدشے کو بڑھا رہے ہیں کہ یہ تصادم مزید وسیع شکل اختیار کر سکتا ہے۔
