مغربی ایشیا میں جاری کشیدگی اب ایک وسیع فوجی تصادم کی صورت اختیار کرتی دکھائی دے رہی ہے۔ خطے کے مختلف ممالک سے موصول ہونے والی اطلاعات کے مطابق ایران کی جانب سے اسرائیل اور امریکی تنصیبات کو نشانہ بناتے ہوئے میزائل اور ڈرون حملے کیے جا رہے ہیں۔ حالات تیزی سے بدل رہے ہیں اور کئی دارالحکومتوں میں ہائی الرٹ نافذ کر دیا گیا ہے۔
جنوبی اسرائیل کے شہر بیرشیبع سمیت متعدد علاقوں میں میزائل گرنے اور زور دار دھماکوں کی اطلاعات ہیں۔ مقامی ذرائع ابلاغ کے مطابق ان حملوں میں کئی افراد زخمی ہوئے ہیں۔ اسرائیلی فوج نے تصدیق کی ہے کہ اس نے ایران کی جانب سے داغی گئی میزائلوں کی ایک نئی لہر کا سراغ لگایا، جس کے بعد فضائی دفاعی نظام کو فعال کر دیا گیا۔ متعدد شہروں میں خطرے کے سائرن بجائے گئے اور شہریوں کو محفوظ مقامات پر منتقل ہونے کی ہدایات جاری کی گئیں۔
سعودی دارالحکومت ریاض کے سفارتی علاقے میں قائم امریکی سفارت خانے کے اطراف دھماکوں اور آگ لگنے کی اطلاعات سامنے آئی ہیں۔ عینی شاہدین نے فضا میں ڈرون جیسی سرگرمی دیکھنے کا دعویٰ کیا ہے۔ ریاض میں واقع ہوٹل کے قریب بھی حملے سے متعلق تصاویر منظر عام پر آئی ہیں۔ انتظامیہ نے پورے علاقے کو سیل کر کے تحقیقات کا آغاز کر دیا ہے۔
اس کے علاوہ بحرین اور سعودی عرب کو ملانے والے اسٹریٹجک اہمیت کے حامل پل کے نزدیک ڈرون سرگرمی کی اطلاع نے سکیورٹی اداروں کو مزید چوکس کر دیا ہے۔
بحرین میں امریکی فوجی اڈے کے قریب دھماکوں اور دھوئیں کے مناظر رپورٹ ہوئے ہیں، جبکہ کویت میں امریکی سفارت خانے کے احاطے کے اطراف بھی دھماکوں کی اطلاعات ہیں۔ کویتی فضائی حدود میں ایک امریکی لڑاکا طیارے کے گر کر تباہ ہونے کی خبر سامنے آئی ہے، تاہم پائلٹ کے محفوظ رہنے کی تصدیق کر دی گئی ہے۔
مغربی عراق کے ایک کھیت سے ایک ناکارہ امریکی ’کامی کاز‘ ڈرون برآمد ہونے کی اطلاع ہے۔ سکیورٹی ذرائع کے مطابق اس نوعیت کے کم لاگت ڈرون حالیہ فوجی کارروائیوں میں استعمال کیے گئے ہیں۔ عراقی حکام نے علاقے کا محاصرہ کر کے تحقیقات تیز کر دی ہیں۔
دفاعی ماہرین کا کہنا ہے کہ اگر یہ سلسلہ جاری رہا تو مغربی ایشیا ایک ہمہ گیر علاقائی جنگ کی طرف بڑھ سکتا ہے۔ اسرائیل اور ایران کے درمیان براہِ راست حملوں اور امریکی تنصیبات کو نشانہ بنائے جانے سے تنازع کا دائرہ کئی ممالک تک پھیل چکا ہے۔ متعدد ممالک نے اپنے شہریوں کو محتاط رہنے اور غیر ضروری سفر سے گریز کرنے کی ہدایت جاری کی ہے۔
