سوشل ڈیموکریٹک پارٹی آف انڈیا (ایس ڈی پی آئی) نے وینزویلا پر امریکہ کی جانب سے کیے گئے فوجی حملوں اور صدر نکولس مادورو کی مبینہ غیر قانونی گرفتاری کی سخت الفاظ میں مذمت کی ہے۔ پارٹی نے اس اقدام کو بین الاقوامی قوانین، اقوامِ متحدہ کے چارٹر اور قومی خودمختاری کے بنیادی اصولوں کی کھلی خلاف ورزی قرار دیا ہے۔
ایس ڈی پی آئی کے قومی نائب صدر محمد شفیع نے اپنے جاری کردہ بیان میں کہا کہ امریکہ کی یہ کارروائی نہ صرف اقوامِ متحدہ کے چارٹر کے آرٹیکل 2(4) کی صریح خلاف ورزی ہے بلکہ یہ گلوبل ساؤتھ کے ممالک میں مداخلت اور سامراجی ذہنیت کی ایک خطرناک مثال بھی ہے۔ انہوں نے کہا کہ یہ فوجی حملہ نہ تو امریکی کانگریس کی منظوری سے کیا گیا اور نہ ہی اقوامِ متحدہ کی کسی قانونی اجازت کے تحت۔
پارٹی کے مطابق امریکی فوجی کارروائی کے دوران 150 سے زائد جنگی طیاروں نے وینزویلا کے دارالحکومت کراکس میں مختلف فوجی تنصیبات کو نشانہ بنایا، جن میں صدارتی محل میرافلوریز پیلس بھی شامل تھا۔ ان حملوں کے نتیجے میں عام شہریوں کی ہلاکتیں ہوئیں، بجلی کی فراہمی متاثر ہوئی اور بڑے پیمانے پر بنیادی ڈھانچے کو نقصان پہنچا۔ وینزویلا کی نائب صدر ڈیلسے رودریگز نے صورتحال کے پیش نظر ملک میں قومی ایمرجنسی نافذ کرنے کا اعلان کیا ہے۔
ایس ڈی پی آئی نے امریکہ کی جانب سے لگائے گئے الزامات کو مسترد کرتے ہوئے کہا کہ نام نہاد ’’نارکو ٹیررازم‘‘ کے نام پر کیا گیا یہ حملہ جھوٹے دعوؤں پر مبنی ہے، جیسا کہ ماضی میں عراق پر حملے کے دوران دیکھا گیا تھا۔ پارٹی کے مطابق اس کارروائی کا اصل مقصد وینزویلا کے وسیع قدرتی وسائل، بالخصوص تیل کے ذخائر، پر کنٹرول حاصل کرنا ہے۔
بیان میں کہا گیا کہ وینزویلا کے پاس دنیا کے سب سے بڑے تیل کے ذخائر موجود ہیں، جنہیں 1976 میں قومی تحویل میں لیا گیا تھا۔ دہائیوں سے جاری امریکی پابندیوں نے پہلے ہی وینزویلا کی معیشت کو شدید نقصان پہنچایا ہے اور اب فوجی مداخلت سے حالات مزید بگڑنے کا خدشہ ہے۔ پارٹی نے خبردار کیا کہ اس صورتحال کے نتیجے میں عالمی سطح پر تیل کی قیمتوں میں اضافہ اور خطے میں مہاجرین کے بحران کے سنگین ہونے کا خطرہ پیدا ہو سکتا ہے۔
ایس ڈی پی آئی نے یہ بھی کہا کہ وینزویلا کا فلسطین نواز موقف اور غزہ میں اسرائیلی فوجی کارروائیوں کے خلاف کھلا احتجاج بھی امریکہ کے ساتھ بڑھتی ہوئی کشیدگی کی ایک اہم وجہ رہا ہے۔ صدر نکولس مادورو نے مختلف بین الاقوامی فورمز پر فلسطینی عوام کے حقِ خود ارادیت اور عالمی سطح پر جوابدہی کی مسلسل حمایت کی ہے۔
پارٹی نے بھارتی حکومت سے اپیل کی ہے کہ وہ غیر وابستہ تحریک (نان الائنڈ موومنٹ) میں اپنی تاریخی ذمہ داری کو نبھاتے ہوئے امریکی حملوں کی واضح اور غیر مشروط مذمت کرے، صدر نکولس مادورو کی فوری رہائی کا مطالبہ کرے اور اقوامِ متحدہ کی سلامتی کونسل کا ہنگامی اجلاس بلانے کی پہل کرے۔
ایس ڈی پی آئی نے کہا کہ اگر بھارت اس نازک موقع پر خاموشی اختیار کرتا ہے تو یہ اس کی نوآبادیاتی مخالف اور امن پسند وراثت کے منافی ہوگا۔ پارٹی نے وینزویلا کے عوام اور ان تمام ممالک کے ساتھ مکمل یکجہتی کا اظہار کیا جو سامراجی دباؤ اور فوجی جارحیت کے خلاف جدوجہد کر رہے ہیں۔
