بی.جے.پی کی اندرونی میٹنگ کا ویڈیو وائرل،سمراٹ چودھری کہ رہے”تیجسوی پر بولنے سے نقصان، لالو پر حملے سے فائدہ”

اِنصاف ٹائمس ڈیسک

وزیر اعظم نریندر مودی کے حالیہ بہار دورے کے بعد، بھاگلپور سرکٹ ہاؤس میں منعقدہ ایک اندرونی میٹنگ کی ویڈیو سوشل میڈیا پر تیزی سے وائرل ہو رہی ہے۔ اس ویڈیو میں بہار کے نائب وزیر اعلیٰ سمراٹ چودھری اور مرکزی وزیر گری راج سنگھ سمیت دیگر سینئر بی جے پی رہنما اسمبلی انتخابات کے حوالے سے حکمت عملی بناتے نظر آ رہے ہیں۔

ویڈیو میں سمراٹ چودھری یہ کہتے ہوئے سنے جا سکتے ہیں۔”تیجسوی یادو پر بولنے سے ہمیں نقصان ہوتا ہے اور لالو یادو پر بولنے سے فائدہ ہوتا ہے۔” اس پر گری راج سنگھ ہاتھ جوڑ کر اس بات سے اتفاق کرتے دکھائی دے رہے ہیں۔ اس سے یہ اشارہ ملتا ہے کہ بی جے پی اب اپنی حملوں کی توجہ لالو پرساد یادو پر مرکوز کرنا چاہتی ہے، جبکہ تیجسوی یادو پر براہ راست حملے سے گریز کر رہی ہے۔

یہ ویڈیو وائرل ہونے کے بعد راشٹریہ جنتا دل (آر جے ڈی) نے بی جے پی کو سخت تنقید کا نشانہ بنایا ہے۔ آر جے ڈی نے اپنے آفیشل سوشل میڈیا اکاؤنٹ پر ویڈیو شیئر کرتے ہوئے لکھا: "وزیر اعظم مودی کے بہار دورے کے بعد، مرکزی اور ریاستی وزراء سینئر بی جے پی رہنماؤں کے ساتھ میٹنگ میں یہ فیصلہ کر رہے ہیں کہ تیجسوی یادو پر حملہ نہ کیا جائے۔” آر جے ڈی نے بی جے پی پر چہرہ، کردار، چال اور ترقیاتی منصوبے کی کمی کا الزام عائد کرتے ہوئے کہا کہ یہ پارٹی صرف اقتدار کے پیچھے بھاگ رہی ہے اور ریاست کو لوٹنے میں مصروف ہے۔

اس معاملے نے بہار کی سیاست میں نئی گرمی پیدا کر دی ہے۔ بی جے پی کی اندرونی حکمت عملی کے یوں سامنے آنے سے آئندہ انتخابات میں پارٹی کے منصوبے اور اپوزیشن کی حکمت عملی پر زبردست بحث چھڑ گئی ہے۔