انصاف ٹائمس ڈیسک
بہار اسمبلی انتخابات 2025 کے پیشِ نظر این ڈی اے میں سیٹ شیئرنگ کے معاملے پر ہلچل بڑھ گئی ہے۔ مرکزی وزیر اور ہندستانی عوام موچ (HAM) کے سرپرست جیتن رام مانجھی نے پارٹی کے لیے 15 سے 20 نشستوں کا مطالبہ کیا ہے۔ تاہم ان کے بیٹے اور HAM کے قومی صدر سنتوش کمار سومن نے والد کے بیان سے مختلف موقف اختیار کرتے ہوئے این ڈی اے کے ساتھ رہنے کی بات کی ہے۔
جیتن رام مانجھی نے اتوار کو کہا کہ اگر ان کی پارٹی کو این ڈی اے میں 15 سے 20 نشستیں نہیں ملتیں تو وہ آزادانہ طور پر انتخابات لڑنے کا آپشن بھی اپنا سکتے ہیں۔ ان کا کہنا تھا کہ پارٹی کو ریاستی سطح پر تسلیم شدہ جماعت بنانے کے لیے کم از کم سات نشستیں جیتنا ضروری ہیں، اور اس کے لیے زیادہ نشستوں پر انتخاب لڑنا لازم ہے۔
ہندوستانی عوام مورچہ کے قومی صدر سنتوش سومن نے کہا کہ وہ این ڈی اے کی نظریاتی بنیاد کے ساتھ مضبوطی سے کھڑے ہیں اور کسی اور آپشن پر غور نہیں کر رہے۔ انہوں نے بتایا کہ پارٹی کو زیادہ نشستوں کی ضرورت ہے، لیکن یہ مطالبہ وہ میڈیا میں نہیں بلکہ این ڈی اے کی میٹنگ میں اٹھائیں گے۔
لوک جن شکتی پارٹی-رام ولاس (LJP-RV) کے صدر چراغ پاسوان نے اپوزیشن پر الزام لگایا کہ وہ نشستوں اور انتخابی معاملات کے حوالے سے عوام کو گمراہ کر رہے ہیں۔ اس دوران HAM کے اندر نشستوں کو لے کر اختلافات اور والد و بیٹے کے مختلف بیانات نے این ڈی اے میں کشیدگی بڑھا دی ہے۔
ہم پارٹی کا ہدف ریاستی سطح پر تسلیم شدہ جماعت بننا ہے۔ اس کے لیے پارٹی کو 243 اسمبلی نشستوں میں کم از کم سات پر جیت اور کل ووٹ کا 6 فیصد حاصل کرنا ضروری ہے۔ یہی وجہ ہے کہ HAM 15 سے 20 نشستوں پر انتخابات لڑنا چاہتی ہے۔
سنتوش سومن نے واضح کیا کہ فی الحال ان کی اولین ترجیح این ڈی اے کے ساتھ انتخابات لڑنا ہے۔ انہوں نے کہا کہ نشستیں کتنی ملیں گی اور کون کون انتخاب لڑے گا، اس کا فیصلہ اتحاد کی میٹنگ کے بعد ہوگا۔ ساتھ ہی انہوں نے کہا کہ پارٹی کے کارکنان کو بھی انتخابی میدان میں اتارا جائے گا۔
سیاسی تجزیہ کاروں کے مطابق والد اور بیٹے کے مختلف بیانات این ڈی اے میں نشستوں کی اپنی مانگ کو مضبوط کرنے کی حکمت عملی کا حصہ بھی ہو سکتے ہیں۔ 2020 کے اسمبلی انتخابات میں HAM نے این ڈی اے کے ٹکٹ پر سات نشستوں پر امیدوار کھڑے کیے تھے، جن میں سے چار پر کامیابی حاصل ہوئی تھی۔
آئندہ دنوں میں این ڈی اے میں سیٹ شیئرنگ پر کیا فیصلہ ہوتا ہے اور HAM کی انتخابی حکمت عملی کس سمت جاتی ہے، یہ بہار کی سیاسی حرکیات کے لیے اہم ثابت ہوگا۔
