پٹنہ (سیف الرحمٰن/انصاف ٹائمس) آج وارانسی کی گیان وياپی مسجد کا جائزہ مکمّل ہوگیا ہے جس کے بعد عرضی دہندہ نے دعویٰ کیا ہے کہ مسجد کے ایک مقام پر جہاں پر وضو خانہ تھا وہاں پر شیولنگ ملا ہے – اس دعوے کے بعد مقامی عدالت نے مقامی ڈسٹرکٹ مجسٹریٹ کو حکم دیا ہے کہ جہاں پر شیولنگ ملا ہے اس جگہ کو فوراً سیل کردے اور اس جگہ پر کسی کو بھی جانے نہ دیا جائے ساتھ ہی یہ بھی حکم دیا ہے کہ “بنارس کے ڈسٹرکٹ مجسٹریٹ ،پولیس کمشنر، اور سی آر پی ایف کی ذاتی ذمّہ داری ہوگی کہ اس مقام کو محفوظ رکھے” اس کے بعد انتظامیہ نے کہا کہ ہماری ٹیم وضو خانہ کے علاقے کو سیل کر رہی ہے جو کہ مسجد کا 10 فیصد حصّہ ہے باقی حصّہ مسلمانوں کے استعمال کیلئے ہے اور وضو خانہ کے متبادل کے انتظام میں انتظامیہ مدد کریگی اور انتظام کریگی- اس بیچ مسجد انتظامیہ کا کہنا ہے کہ جس چیز کو شیولنگ کہا جا رہا ہے وہ وضو خانہ کا فوارہ ہے – واضح ہو کہ آج جائزہ مکمل ہوگیا ہے لیکن اندر کی بات کسی فریق کو نہیں بتائی گئی ہے بلکہ 17 مئی کو رپورٹ عدالت میں پیش کی جائیگی