اِنصاف ٹائمس ڈیسک
بہار میں سوشل میڈیا پر بڑھتی ہوئی نفرت انگیز پوسٹوں، دو معنی والے فحش بھوجپوری گانوں، موب لنچنگ اور پولیس حراست میں اموات کے واقعات پر آل انڈیا مجلس اتحاد المسلمین (AIMIM) کے سینئر رہنماؤں نے ریاستی حکومت سے فوری اور مؤثر کارروائی کا مطالبہ کیا ہے۔
مجلس اتحاد المسلمین بہار کے صدر اور امور اسمبلی حلقہ سے ایم ایل اے اخترالایمان، ریاستی جنرل سیکریٹری آفتاب احمد اور پارٹی کے قومی ترجمان ایڈووکیٹ عادل حسن نے بہار حکومت کے محکمہ داخلہ کے ایڈیشنل چیف سکریٹری سے ملاقات کی اور ان سنگین مسائل پر تفصیل سے گفتگو کی۔
مجلس قائدین نے ریاست میں بڑھتی فرقہ وارانہ نفرت، اشتعال انگیز مواد، فحش بھوجپوری گیتوں کی یلغار، موب لنچنگ کے واقعات اور پولیس حراست میں ہو رہی اموات پر شدید تشویش ظاہر کی۔ انہوں نے حکومت سے مطالبہ کیا کہ ان معاملات پر فوری اور سخت کارروائی کی جائے تاکہ عوام کا اعتماد قائم رہے۔
اس ملاقات کے بعد محکمہ داخلہ کے ایڈیشنل چیف سکریٹری نے وفد کو یقین دہانی کرائی کہ قصورواروں کے خلاف سخت ترین کارروائی کی جائے گی۔ انہوں نے یہ بھی کہا کہ سائبر سیل کو مزید چوکس اور متحرک بنایا جا رہا ہے تاکہ سوشل میڈیا پر پھیلنے والی نفرت اور افواہوں پر بروقت قابو پایا جا سکے۔
مجلس اتحاد المسلمین کے قومی ترجمان ایڈووکیٹ عادل حسن نے کہا “ہماری جماعت ریاست میں امن، بھائی چارے اور قانون کی عملداری کی بحالی کے لیے پرعزم ہے۔ نفرت پھیلانے والوں اور قانون ہاتھ میں لینے والوں کو ہرگز بخشا نہیں جانا چاہیے۔”
اس قدم کو سماجی کارکنوں اور عوامی حلقوں سے خوب سراہا گیا ہے جنہوں نے AIMIM قیادت کی سنجیدہ کوششوں کی تعریف کی ہے۔