انصاف ٹائمس ڈیسک
مہاراشٹر اسمبلی میں سماج وادی پارٹی (ایس پی) کے ایم ایل اے ابو عاصم اعظمی کو مغل حکمران اورنگزیب کی تعریف کرنے کے بعد سخت مخالفت کا سامنا کرنا پڑا۔ اس تنازعے کے نتیجے میں انہیں اسمبلی کے موجودہ اجلاس سے معطل کر دیا گیا۔ پارلیمانی امور کے وزیر چندرکانت پاٹل نے اعظمی کی معطلی کی تجویز پیش کی، جسے اسمبلی نے منظور کر لیا۔
اکھلیش یادو نے سوال اٹھائے
ابو عاصم اعظمی کی معطلی پر سماج وادی پارٹی کے قومی صدر اکھلیش یادو نے ردعمل ظاہر کرتے ہوئے کہا "اگر معطلی کا پیمانہ نظریاتی جھکاؤ بن جائے گا تو اظہارِ رائے کی آزادی اور غلامی میں کیا فرق رہ جائے گا؟ ہمارے ایم ایل اے ہوں یا ایم پی، ان کی بے خوف دانشمندی بے مثال ہے۔ کچھ لوگ اگر یہ سمجھتے ہیں کہ ‘معطلی’ کے ذریعے سچ کی زبان کو دبایا جا سکتا ہے، تو یہ ان کی منفی سوچ کی بچگانہ حرکت ہے۔”
اکھلیش یادو نے بی جے پی حکومت کو نشانہ بناتے ہوئے کہا "آزاد خیال کہے آج کا، نہیں چاہیے بی جے پی کا راج۔”
ابو عاصم اعظمی کی وضاحت
معطلی کے بعد ابو عاصم اعظمی نے وضاحت پیش کرتے ہوئے کہا کہ ان کے بیان کو توڑ مروڑ کر پیش کیا گیا ہے۔ انہوں نے کہا کہ ان کا مقصد کسی کے جذبات کو ٹھیس پہنچانا نہیں تھا، بلکہ انہوں نے صرف تاریخی حقائق بیان کیے تھے۔
سیاسی حلقوں میں بڑھتی بحث
اس معاملے کو لے کر مہاراشٹر کی سیاست میں ہلچل مچ گئی ہے۔ بی جے پی اور شیو سینا (شندے گروپ) نے سخت موقف اپناتے ہوئے اعظمی کے بیان کی مذمت کی، جبکہ اپوزیشن جماعتوں نے اسے اظہارِ رائے کی آزادی پر حملہ قرار دیا۔