اِنصاف ٹائمس ڈیسک
اتراکھنڈ میں ہندو رکشا دل کے ایک رکن کی جانب سے کشمیری مسلمانوں کو ریاست چھوڑنے کی کھلی دھمکی کا معاملہ سامنے آیا ہے۔ ویڈیو میں مذکورہ شخص صاف طور پر کہتا ہے کہ اگر کشمیری مسلمان صبح 10 بجے تک ریاست نہیں چھوڑتے تو اُنہیں سنگین نتائج بھگتنا پڑیں گے۔
اس دھمکی کے بعد ریاست میں رہنے والے کشمیری طلبہ اور عام شہریوں میں خوف و ہراس کا ماحول ہے۔ متعدد طلبہ نے بتایا کہ اُنہیں ان کے مکان مالکان نے گھر خالی کرنے کا حکم دے دیا ہے۔
اس واقعہ کے بعد مختلف سماجی تنظیموں اور سیاسی رہنماؤں نے ریاستی حکومت سے فوری کارروائی کا مطالبہ کیا ہے۔ انہوں نے وزیر اعلیٰ پشکر سنگھ دھامی سے اپیل کی ہے کہ وہ ریاست میں مقیم کشمیری شہریوں کی حفاظت کو یقینی بنائیں اور نفرت پھیلانے والے عناصر کے خلاف سخت کارروائی کریں۔
فی الحال ریاستی حکومت کی جانب سے اس معاملے پر کوئی باضابطہ بیان سامنے نہیں آیا ہے، تاہم پولیس کا کہنا ہے کہ وہ ویڈیو اور واقعے کی جانچ کر رہے ہیں اور قصورواروں کے خلاف مناسب کارروائی کی جائے گی۔