اِنصاف ٹائمس ڈیسک
بہار اسمبلی انتخابات 2025 سے قبل ریاست کی سیاست میں ایک بار پھر ہلچل تیز ہو گئی ہے۔ اس بار چرچا کا مرکز بنے ہیں وزیراعلیٰ نتیش کمار کے بیٹے نشانت کمار، جن کی سیاست میں شمولیت کو لے کر قیاس آرائیاں زوروں پر ہیں۔ تاہم جمعہ کو میڈیا سے گفتگو کے دوران نشانت کمار نے سیاست میں داخلے کے سوال پر گول مول انداز میں صرف اتنا کہا – "چلیے-چلیے۔”
عوام سے اپیل: این ڈی اے کو دوبارہ اکثریت دلائیں
نشانت کمار نے میڈیا سے گفتگو کرتے ہوئے بہار کی عوام سے بڑی اپیل کی۔ انہوں نے کہا: “میں بہار کی عوام سے اپیل کرتا ہوں کہ چونکہ انتخابات ہونے والے ہیں، تو این ڈی اے کی حکومت بنائیں۔ این ڈی اے کو بھاری اکثریت سے کامیاب کریں۔ پتا جی (نتیش کمار) وزیراعلیٰ رہیں اور ایک بار پھر ترقیاتی کام جاری رکھیں۔”
یہ بیان ایسے وقت پر آیا ہے جب ریاست میں سیاسی حالات تیزی سے بدل رہے ہیں اور نئے چہروں کی سیاست میں انٹری پر بحث جاری ہے۔
تیجسوی یادو پر کیا کہا نشانت نے؟
جب صحافیوں نے نشانت سے پوچھا کہ بہار کے سابق نائب وزیراعلیٰ تیجسوی یادو کبھی ان کے خلاف کچھ نہیں کہتے بلکہ اکثر تعریف کرتے ہیں، تو اس پر نشانت نے مسکراتے ہوئے کہا: “ٹھیک ہے، ہمارے چھوٹے بھائی ہیں۔ ایسا کہتے ہیں، اچھی بات ہے۔”
اور جب تیجسوی یادو کو وزیراعلیٰ کے چہرے کے طور پر پیش کیے جانے پر سوال ہوا تو نشانت نے کہا: “عوام دیکھے گی۔ ہم عوام کے درمیان چلتے ہیں۔ عوام ہی فیصلہ کرے گی کہ کون بہتر ہے، کیا ہے۔”
سیاست میں انٹری ابھی واضح نہیں
نشانت کمار کی سیاست میں انٹری کو لے کر لگاتار چرچے ہو رہے ہیں، لیکن فی الحال انہوں نے کوئی صاف اشارہ نہیں دیا ہے۔ البتہ جس انداز میں انہوں نے این ڈی اے کی حمایت کی ہے، وہ اس بات کی طرف اشارہ ضرور کرتا ہے کہ وہ مستقبل قریب میں کوئی اہم کردار نبھا سکتے ہیں۔
کیا نشانت سیاست میں اتریں گے یا پس پردہ کردار ادا کریں گے؟ یہ تو وقت ہی بتائے گا، لیکن ان کے حالیہ بیانات سے اندازہ ہوتا ہے کہ وہ سیاسی میدان میں سرگرم ہونے کو تیار ہیں۔