انصاف ٹائمس ڈیسک
بہار حکومت نے مالی سال 2025-26 کے لیے 3.17 لاکھ کروڑ روپے کا بجٹ پیش کیا ہے۔ تاہم، اس بجٹ پر پلورلس پارٹی کی قومی صدر پشپم پریا چودھری نے سخت ردعمل دیا ہے۔ انہوں نے کہا کہ یہ بجٹ بہار کی خود کفالت کی اصل تصویر پیش کرتا ہے، جہاں آج بھی 73 فیصد رقم مرکزی حکومت سے آتی ہے اور ریاست اپنے وسائل سے صرف 27 فیصد ہی حاصل کر پا رہی ہے۔
بہار اب بھی خود کفیل نہیں
پشپم پریا چودھری نے بہار کا موازنہ دیگر ریاستوں سے کرتے ہوئے کہا، "گجرات اپنے بجٹ کا 73 فیصد خود کماتا ہے، تمل ناڈو 76 فیصد اور اتر پردیش بھی 46 فیصد ریونیو اپنے ذرائع سے حاصل کر لیتا ہے۔ لیکن بہار آج بھی ایک طفیلی ریاست بنا ہوا ہے، نہ کمانے میں آگے، نہ کھانے میں آگے۔” انہوں نے وزیر اعلیٰ نتیش کمار کے 20 سالہ دور اقتدار پر سوال اٹھاتے ہوئے کہا کہ اتنے سالوں میں بھی بہار اپنی مالی حالت مضبوط نہیں کر سکا۔
بہار کو خود کفیل بنانے کی ضرورت
ریاست کی اس صورت حال پر ماہرین اقتصادیات کا کہنا ہے کہ حکومت کو صنعت، تجارت اور بنیادی ڈھانچے پر توجہ دینی ہوگی۔ ریاست میں سرمایہ کاری بڑھانے اور محصولات اکٹھا کرنے کے لیے ٹیکس کے نظام کو مضبوط کرنے کی ضرورت ہے۔
پلورلس پارٹی کی صدر کا کہنا ہے کہ اگر بہار کو آگے بڑھانا ہے تو اسے مالی طور پر خود کفیل بنانا ہوگا۔ "بجٹ صرف اعداد و شمار کا کھیل نہیں ہونا چاہیے، بلکہ اس کا مقصد ریاست کو خود کفیل بنانا ہونا چاہیے،” انہوں نے کہا۔
اب دیکھنا ہوگا کہ بہار حکومت اس تنقید کا جواب کیسے دیتی ہے اور خود کفالت کی سمت میں کون سے اقدامات اٹھاتی ہے۔