انصاف ٹائمس ڈیسک
بہار کے شیوہر ضلع کے نیاگاؤں پوروی پنچایت میں ایک دل دہلا دینے والا واقعہ۔پیش آیا۔ ہفتہ کے روز بجلی محکمہ کی ٹیم نے 50 سالہ مزدور جیتو رام کے گھر پر 25,000 روپے کا بقایا بجلی بل تھما دیا۔ اتنی بڑی رقم سن کر جیتو رام کو شدید صدمہ پہنچا اور انہیں سینے میں تیز درد محسوس ہونے لگا۔ اہل خانہ انہیں فوری طور پر اسپتال لے جانے کی کوشش کرنے لگے، مگر راستے میں ہی ان کا انتقال ہو گیا۔
یہ خبر پورے علاقے میں پھیلتے ہی گاؤں والوں میں شدید غم و غصہ پیدا ہو گیا۔ مقامی افراد کا کہنا ہے کہ بجلی محکمہ من مانی طریقے سے بلوں کی وصولی کر رہا ہے، جس کی وجہ سے غریب خاندان سخت پریشان ہیں۔ اطلاع ملتے ہی شیام پور بھٹھا تھانے کے انچارج سنیل کمار پولیس فورس کے ساتھ موقع پر پہنچے اور صورتحال کو قابو میں کیا۔ پولیس نے میت کو پوسٹ مارٹم کے لیے بھیج دیا ہے اور معاملے کی تفتیش جاری ہے۔
گاؤں والوں نے انتظامیہ سے معاوضے اور انصاف کا مطالبہ کیا ہے۔ اس واقعے نے بجلی محکمہ کی کارکردگی اور بقایا بلوں کی وصولی کے طریقوں پر سوالات کھڑے کر دیے ہیں۔ مقامی افراد کا کہنا ہے کہ محکمہ کو غریب خاندانوں کی مالی حالت کو مدنظر رکھ کر وصولی کرنی چاہیے تاکہ اس طرح کے افسوسناک واقعات کو روکا جا سکے