اِنصاف ٹائمس ڈیسک
سوشل ڈیموکریٹک پارٹی آف انڈیا (ایس.ڈی.پی.آئی) کی کیرالا شاخ نے وقف ترمیمی بل کے خلاف اپنی ملک گیر مہم کے تحت کولم شہر کے بعد ملاپورم میں ایک عظیم الشان ریلی اور کانفرنس کا انعقاد کیا، جس میں ہزاروں مرد و خواتین نے شرکت کی۔
ایس ڈی پی آئی کے قومی جنرل سکریٹری پی عبدالمجید فیضی نے کہا کہ وقف ترمیمی بل اس وقت تک بی جے پی کا پیچھا کرے گا جب تک کہ مودی حکومت، جو وقف بورڈ کی ساخت اور اختیارات کو پامال کر کے مسلمانوں کے وجود کو ختم کرنے پر تلی ہوئی ہے، کو اقتدار سے بے دخل نہیں کر دیا جاتا۔ وہ ملاپورم میں ایس ڈی پی آئی کی طرف سے ‘سماجی تحفظ کے لیے وقف کا تحفظ’ کے نعرے کے تحت منعقدہ وقف تحفظ ریلی کے اختتام پر ایک عظیم الشان کانفرنس کا افتتاح کر رہے تھے۔
نیا وقف ترمیمی قانون، جو شہریت ترمیمی قانون کی طرح صرف مسلمانوں کو نشانہ بناتا ہے، غیر آئینی اور امتیازی ہے۔ ملک میں ہندوؤں اور سکھوں سمیت مذہبی اداروں اور املاک کے تحفظ کے لیے خصوصی قوانین موجود ہیں۔ اگرچہ ان تمام قوانین میں رکنیت صرف متعلقہ مذہب کے افراد کو ہی حاصل ہے، لیکن مسلم وقف بورڈ میں لازمی طور پر غیر مسلموں کو شامل کرنے کی تجویز مسلم مخالف جذبات کی عکاسی کرتی ہے۔ انہوں نے کہا کہ تمام جمہوریت پسندوں کی ذمہ داری ہے کہ اس غیر آئینی اقدام کی مخالفت کریں۔
ایس ڈی پی آئی کے ریاستی صدر سی پی اے لطیف نے تقریب کی صدارت کی۔ ایس وائی ایف کے ریاستی سکریٹری اشرف باقوی، مفتی امین ماہی، خالد موسیٰ ندوی، ایس ڈی پی آئی کی قومی ورکنگ کمیٹی کے رکن مفتوپوزا اشرف مولوی، ویمن انڈیا موومنٹ کی ریاستی صدر سنیتا نثار، ایس ڈی پی آئی کے ریاستی نائب صدر تلسی ددھرن پالیکل، جنرل سکریٹری پی کے کے۔ عبدالجبار، ریاستی سکریٹری کرشنن ایرانجیکل، وی ٹی اکرام الحق، اور انور پازنجی نے بھی خطاب کیا۔
ریاستی جنرل سکریٹری پی آر سیاد اور رائے اراکل، سکریٹریز انصاری ایناتھ، پی جمیلہ، منجوشا ماولادم، خزانچی این کے رشید عمری، ریاستی سکریٹریٹ کے رکن اجمل اسماعیل، ریاستی ورکنگ کمیٹی کے ارکان اشرف پرواچمبلم، جارج منڈکایام، وی کے شوکت علی، ضلع صدر ناصر، شھیر چلاپورم، مصطفی کمیری، یوسف وایاناڈ، بشیر، سواد سی اے، سی آئی محمد صیاد، ایس محمد انیش اور ضلعی سکریٹری بھی موجود رہے۔
وقف تحفظ ریلی، جو ملاپورم ایم ایس پی علاقے سے شروع ہوئی، ورنگوڈ کے مچینگل بائی پاس علاقے میں اختتام پذیر ہوئی۔ ریلی اور عظیم الشان اجتماع میں خواتین اور بچوں سمیت ہزاروں افراد نے شرکت کی۔