کیبنیٹ میں ایک بھی مسلم کا نہ ہونا افسوسناک، اس سلسلے میں نتیش کمار سے بات کرنے کا جناب کریم نے محمد رفیع کو دلایا بھروسہ
پٹنہ (محمد رفیع/اِنصاف ٹائمس) مرکزی حکومت میں جد یو کوٹہ سے للن سنگھ و رام ناتھ ٹھاکر کو وزیر بنائے جانے کا ڈاکٹر احمد اشفاق کریم نے خیر مقدم کیا ہے۔ سابق رکن آف راجیہ سبھا و چانسلر الکریم یونیورسٹی کٹیہار ڈاکٹر احمد اشفاق کریم نے للن سنگھ و رام ناتھ ٹھاکر کو وزیر بنائے جانے پر خوشی کا اظہار کیا ہے اور انہیں دلی مبارکباد پیش کی ہے۔ جناب کریم نے آزاد صحافی محمد رفیع سے کہا کہ وزیر اعلی بہار جناب نتیش کمار نے اس کے ذریعہ سوشل جسٹس کا ثبوت پیش کیا ہے۔ جناب نتیش کمار نے اس طرح عوام کو یہ پیغام دیا ہے کہ وہ سماج کے سبھی طبقوں کو ساتھ لے کر چلنے والے رہنما ہیں اور ہر کسی کو وہ سیاسی حصہ داری دینا چاہتے ہیں۔ خصوصی طور پر انہوں نے رام ناتھ ٹھاکر کو وزیر بنواکر جہاں ایک جانب بہار کے سیاسی رہنماؤں کے آئیڈیل کرپوری ٹھاکر کو خراج عقیدت پیش کیا ہے وہیں سماج کے تمام کمزور طبقوں و پسماندگان کو یہ پیغام دیا ہے کہ حکومت سازی میں وہ صرف ووٹ نہیں دیتے بلکہ انہیں حکومت میں حصہ داری بھی ملتی ہے۔ حالانکہ جناب کریم نے محمد رفیع کے ایک سوال کے جواب میں کیبنیٹ میں ایک بھی مسلم نہیں ہونے پر افسوس ظاہر کیا اور کہا کہ اس کی کوئی صورت نکلے میں جناب نتیش کمار سے بات کروں گا۔ لیکن مسلمان بھی چوک جاتے ہیں، اگر کشن گنج سے ماسٹر مجاہد کو جتا دیتے تو شاید آج وہ کیبنیٹ میں ہماری رہنمائی کرتے۔ جناب کریم نے یقین ظاہر کیا کہ وزیر اعلی بہار جناب نتیش کمار کی رہنمائی میں ہمارے دونوں وزراء للن سنگھ و رام ناتھ ٹھاکر بہتر کام کریں گے اور نتیش جی کے بہار میں ترقی کے ماڈل کو دلی میں نافذ کروانے میں کارگر ثابت ہوں گے تاکہ بہار کی طرح ہی پورے ملک کی ترقی ممکن ہو سکے۔ جناب کریم نے بہار کوٹے سے بننے والے تمام وزراء کو مبارکباد پیش کرتے ہوئے کہا کہ بہار کے لئے یہ فخر کی بات ہے کہ 8 وزراء بہار سے ہیں جس سے یہ امید ظاہر ہوتی ہے کہ بہار کی ترقی میں اب مزید اضافہ ہوگا۔