بہار اسمبلی کے بجٹ سیشن کے گیارھویں دن نائب وزیر اعلیٰ اور شہری ترقی کے وزیر وجے کمار سنہا نے ریاست میں کھلے عام گوشت اور مچھلی کی فروخت پر سخت پابندی کا اعلان کیا ہے۔ انہوں نے کہا کہ اب صرف لائسنس یافتہ دکاندار ہی گوشت فروخت کر سکیں گے، اور قواعد کی خلاف ورزی کرنے والوں کے خلاف سخت کارروائی کی جائے گی۔
سنہا نے اسمبلی میں بتایا کہ کسی کی جذبات کو ٹھیس پہنچائے بغیر قواعد کی پابندی لازم ہوگی۔ انہوں نے کہا “کوئی بھی کھلی سڑک پر گوشت نہیں بیچے گا۔ لائسنس یافتہ دکاندار کے علاوہ کسی کو اجازت نہیں ہوگی، اور خلاف ورزی کرنے والوں پر سخت ایکشن ہوگا۔”
یہ فیصلہ دربھنگہ میں حال ہی میں منعقدہ زمین اصلاحات اور عوامی فلاحی مشاورت کے دوران شہریوں کی شکایات کے بعد لیا گیا۔ شہری علاقوں میں سڑک کنارے گوشت کی کھلی فروخت سے عوام کو مشکلات کا سامنا تھا۔
*حکومت کی نئی ہدایات
گوشت فروخت کرنے کے لیے لائسنس حاصل کرنا لازمی ہوگا۔
دکانیں پردے یا شیشے سے ڈھانکی جائیں گی۔
اسکول، کالج اور مذہبی مقامات کے قریب دکانیں کھولنا ممنوع۔
قواعد کی خلاف ورزی پر 5,000 روپے تک جرمانہ۔
سنہا نے کہا کہ انتظامیہ کو غیر قانونی گوشت کی فروخت پر سخت کارروائی کرنے اور قانونی لائسنس یافتہ دکانداروں کو مناسب مقامات پر منتقل کرنے کی ہدایات دی گئی ہیں۔
بی جے پی کے رہنما اور مرکزی وزیر گیرراج سنگھ نے اس اقدام کا خیرمقدم کیا اور کہا کہ یہ صفائی ستھرائی اور عوامی صحت کے نقطہ نظر سے درست فیصلہ ہے۔
بہار میں پہلے سے ہی کھلے عام گوشت کی فروخت پر پابندی تھی، لیکن کئی جگہوں پر یہ اب بھی جاری تھی۔ اب نئے احکامات کے تحت اس پر مکمل سختی سے عمل درآمد کیا جائے گا۔
