انصاف ٹائمس ڈیسک
پٹنہ: داروغہ بھرتی کے مطالبے کو لے کر پیر کے روز ریاستی دارالحکومت پٹنہ میں امیدواروں نے زبردست احتجاج کیا۔ وزیر اعلیٰ کی رہائش گاہ کی طرف مارچ کر رہے امیدواروں کو ڈاک بنگلہ چوراہے پر پولیس نے روکنے کی کوشش کی۔ اس دوران مظاہرین نے بیریکیڈنگ توڑنے کی کوشش کی جس کے بعد پولیس نے پانی کی توپ اور لاٹھی چارج کا استعمال کیا۔
لاٹھی چارج میں کئی امیدوار، جن میں خواتین بھی شامل تھیں، زخمی ہو گئے۔ مظاہرین کا الزام ہے کہ مرد پولیس اہلکاروں نے خواتین امیدواروں پر بھی طاقت کا استعمال کیا۔
امیدواروں کا کہنا ہے کہ دو برس قبل اعلان کیے گئے 1817 عہدوں پر داروغہ بھرتی کا عمل ابھی تک شروع نہیں کیا گیا۔ ان کا مطالبہ ہے کہ اسمبلی انتخابات سے قبل بھرتی کا عمل شروع کیا جائے۔ ساتھ ہی سالانہ امتحانی کیلنڈر جاری کرنے، جواب کی کلید، کٹ آف اور کاربن کاپی فراہم کرنے کا بھی مطالبہ کیا گیا ہے۔
احتجاج کو اساتذہ تنظیموں کی بھی حمایت حاصل ہوئی۔ اساتذہ لیڈروں نے حکومت سے مطالبہ کیا کہ بھرتی کا عمل فوراً شروع کیا جائے۔
پٹنہ ایس ایس پی کارتکیہ شرما نے کہا کہ امیدواروں کو اپنی بات رکھنے کے لیے متعلقہ افسر سے ملوانے کی یقین دہانی کرائی گئی تھی۔ انہوں نے وارننگ دی کہ ممنوعہ علاقے میں داخل ہونے والے امیدواروں کے خلاف کارروائی کی جائے گی۔
انتظامیہ نے حالات کو قابو میں رکھنے کے لیے اضافی پولیس فورس تعینات کی ہے۔ امیدواروں نے انتباہ دیا ہے کہ اگر ان کے مطالبات پر جلد کارروائی نہ ہوئی تو تحریک مزید تیز کی جائے گی۔
